اسيادي ها العار قيلوني انا ما خو حد

اسيادي ها العار قيلوني انا ما خو حد

الدم لي مايحرك الخو على خوه دم مغشوش
و الوقت اللي تلعب بيا وبيك الله يلعن بوه وقت
كلشي حاضي من لي حاضي و حتى واحد محضا
حضيني غير انا وعندك تخليني نتنفس

اسيادي ها العار قيلوني انا ما خو حد

جمعاتنا الحكرة و الخوف و تبلاز الكلام
شي يجري من ورا شي و مكيصورو غير الفرشي
معدة خاوية و الطانطو يصرع و هو غير هيتر
اش خاص بوك يا القلايمي غير الفهامة
ريح وشد لرض و قول ها محايني ها تخمامي

اسيادي ها العار قيلوني ان مخو حد

حكايتي حكاية المحكور في ارضه
حكاية المقدوة عليه و هاز نيفو لسما
حكاية شعب ميكا كحلة و رايبي جميلة
حكاية شعب البارصا و الريال و لانطير
حكايتي اسيادي مف دينمها ميتسمع

اسيادي ها العار قيلوني ان مخو حد

حكاية الام لي تكري ولدها ب زوج الريال
حكاية الزلط و مادار في هاد القناطح
حكاية موت الضمير و لا تسول على الكرامة
حكاية السعاية كثر من لي خدامين
حكاية لي يسعى بورقة طبيب ولي يطلب برجل خامجة

اسيادي ها العار قيلوني ان مخو حد

حكاية لي يطلب بالكرة و لي يطلب بالتقطيعة
حكاية شعب دينمو معندو وجه
حكاية بولحية لي مصدعنا بالنار و العذاب
حكاية بنات و نسا يبيعو لحمهم للحوالى
حكاية بوكرش و السيجار و انا نسقيه

اسيادي ها العار قيلوني ان مخو حد

حكاية سبعة في خربة و لي بغى دار الوضو يشد الصف
حكاية الولد مقرقرب و البنت تهز داكشي باش توكلهم
حكاية الحداثة و الاصالة و لا تمركز و التنمية
حكاية بلاد الحكرة و الجليس على القراعي
حكاية لي دوا يرعف ولا تلاح عند الروكان
اسيادي ها العار قيلوني ان مخو حد

حكايتي لا تحكوها و لي قراها ينساها