Intro

مرحبا بكم في مدونتي الجديدة
في خلال السطور القديمة سأقدم نبذة عن مدونتي و تصوري لها.
أنا طالب مصري أدرس بإحدي الجامعات في أوروبا ..و أرغب من خلال مدونتي في مناقشة حياة الطلاب المغتربين كما إني في كثير من الأحيان سأتعرض لوجهات نظري الشخصية تجاه كثيرا من القضايا السياسية و الإجتماعية .. سأستعرض ذلك من خلال يومياتي..
أنا لا ألتزم بطريقة كتابة معينة .. فأرجو منكم احتمال هذا على خلاف أنواعه .. أحيانا سأكتب بالعامية المصرية و أحيانا بالعربية كما الإنجليزية أيضا

لا أريد أن أطيل عليكم ... و سأنتقل سريعا لأول موضوع ..يومياتي .. الجمعة 9 يناير 2009 :  ..

أصحى من النوم الصبح بدري على صوت فيروز .. ماهو أنا أصلى ما طفيتش اللابتوب من أمبارح .. بقالي كام يوم مش بأعرف أنام بلليل بسهولة .. فباشغل اغان فيروز كنوع من تهدئة اعصابي ..اعلي الصوتعشان اسمع الاغنية الحلوة .. صوت فيروز جميل ملائكي ابتدي اسمع سنرجع يوما الى حينا .. اعيد الاغنية 3 مرات و انا لسة على السرير في قوضتي (غرفتي) و النور ضلمة و بعدين أعلي الصوت كمان و أسيب بقية الاغاني شغالة .. أروح الحمام المشترك برة القوضة و بعدين أرجع أغسل وشي جوه قوضتي و انور النور و املا البراد (الكيتيل) مية و افكر للحظة اشرب شاي ولا نسكافيه و استقر على النسكافيه جولد لاني نعسان اوي و محتاج حاجة تفوقني ..

ارجع اقعد على سريري قدام الكمبيوتر ا بص على الايميل .. مفيش حاجة جديدة !!
ايميل الجامعة طيب جايز في محاضرة اتلغت و هنام شوية اطول .. برضه مفيش ما باليد حيلة ..ابتدى اشوف الاخبار الاهرام انا قاريه من بليل اصله بينزل على النت بدري على الساعة 11 بلليل لكن مفيش مانع من اني اعيد التصفح الصبح اقرا كام حاجة جديدة
اروح المصري اليوم : يووه همه مش هيتعلموا ينزلوه بدري الساعة 7 دلوقتي في مصر و لسه ما نزلش عدد النهاردة اتنكد شوية و بعدين اروح لايلاف و موقع مصراوي و بي بي سي عربي و انجليزي و سي ان ان عربي و انجليزي برضه ..اقرا الاخبار بتمعن .. لسة المجزرة شغالة في غزة طيب و بعدين ؟؟ الاهلى خرج من الكاس الحمد لله ...اصل الاهلي بالنسبة لي زي البرازيل عالميا زي امريكا كلها حاجات بتمثل لي استبداد الناس كلها بتحبها و بتشجعها .. ممكن ادرجها كلها تحت كلمة أغلبيات مش اقليات .. و انا عشت عمري بكره الاغلبيات فنفسيتي المريضة مش بتستحمل نجاح الاهلي ..
عمرو دياب اتضامن مع غزة و هيأجل اطلاق البومه .. فيك الخير والله يا ابو عمرو

بعد قراءة الاخبار اروح على الفيس بوك و انا باشرب كباية الننسكافيه و باسمع فيروز بعد ما اشوف اخبار اصحابي و الصور الجديدة و مين مغير الستاتوس على غزة و مين كاتبلى على الوول بيطمن علي و يقول اني واحشه (هو مفتقدني يعني )همم

ابتدي البس و انا اتحسر على منظر القوضة ..متكركبة اوي .. محتاج اوضب بسرعة .. البوست ايت (ورق اصفر ضغير بيتلزق على المكتب او الحيطة)ملزوق في كل مكان في الاوضة بيطاردني ماتنساش تكلم فلان و تدفع فلوس التأمين و تجيب تذكرة اوتوبيس جديدة اخر يوم فيها النهاردة ..تغسل الهدوم و ترجع الكتاب لمكتبة الجامعة .. ابتدي احس بصوت والدتي بيطاردني اكني لسة عايش معاها في مصر .. افتقد اهلي للحظة مع صوت فيروز و دمعة مخنوقة في عيني مش عارفة تنزل .. امتي هارجع مصر ...مش عارف

انزل من البيت الحرارة تلج الجو ناقص 14 افتقد مصر تاني استنى الاونوبيس على المحطة 15 دقيقة في الجو ده و انزل اروح الجامعة احضر المحاضرة و انا نعسان و تعبان و اخلص اول محاضرتين اروح البيت بسرعة اسرق 3 ساعات نوم عشان مش قادر البس و انزل المحاضرة التالتة ادخل متأخر يجييلي الاسيستانت يشرحلي مطلوب ايه ؟؟ انجزه بسرعة فائقة .. يستغرب اوي و يقول لي انت كويس خلاص روح النهاردة انت عملت المطلوب افرح و احس بالفخر للحظة و بعدين اقول يعني كان لازم اجي احضر النهاردة مادام الموضوع سهل كدة ما كنت قعدت في البيت .. اخد الميترو و ارورح

الجمعة بليل في اوروبا .. اول يوم في الويك اند الناس كلها لابسة و مستعدة للخروج و انا وحيد كدة مضايق عمال ادندن فيوز في سري .. افكر للحظة اكلم اصحابي في الجامعة اخرج معاهم .. بس مش باحب الجو بتاعهم قوي .. بلاش روح اقعد في البيت .. اروح اكل حاجة بسرعة . اصلي ما اكلتش من الصبح ..توست بالجبنة .. يووه يا رب انا زهقت من النواشف عايز اكل اكل سخن طبيخ يعني يلا مش مهم فيه ناس مش لاقية اكل اصلا اشكر ربنا على نعمته و كل
ارجع اقعد على الكمبيوتر و اشغل فيروز و ينتابني شعور بلذة كدة زي اللى لقى حبيبته بعد 20 سنة رغم اني كنت لسة باسمهعها الصبح و الضهر
اكلم اصحابي و اعيد الجولة الاخبارية تاني .. اذاكر شوية و ارتب القوضة..يعدي الوقت بسرعة .. ..الوقت بلليل اقرر اني ادخل انام عشان اصحى بكرة بدري اعمل الحاجات اللىورايا ..
 ..