يا طبيب الناس ما عندك دوايا
علتي بالقلب عن عينك خفيه
لي سنه و شهور و العله معايا
و الدواء معدوم عند الصيدليه
الله اللي مطّلع سر الخفايا
لا نوى نجّاك من حوض المنيه
ليت قلبي ما تولّع بالصبايا
ليتني ما شفت مجلي الثنيه
خاب ظني فيك يا زين الحلايا
اختلف رأيي و رأيك بالقضيه
طول عمري ما تعمّدت الخطايا
اعذريني يا العنود الغشمريه
و الهوى ممنوعة ٍ فيه الشكايا
يا قتيل الحب مجهول الهويه
لو دريت انك تسوى ذا السوايا
كان ما تعّبتني روحه و جيه
يا لطيف الروح في حبك مزايا
لا حشى لله انا ما شفت زيه
روح يا مملوح و اسرارك خفايا
عندنا اسرار الهوى دايم خفيه
عندنا الاسرار ما تعطى هدايا
عندنا المخلوق ما يغادر خويه