عاجل... اجتماع الرئيس بشار الاسد مع القيادات الكردية

يتهامس ممثل المجلس السياسي الكردي وممثل التحالف الديمقراطي الكردي خلال انتظارهم الطويل في الغرفة المقرر فيها لقائهم مع الرئيس بشار الاسد

- فوفو ممثل المجلس: شو رايك...استاذ حوحو بتعتقد انهم رح يقدمو تنازلات في هذه المرحلة وخاصة ان الثورة السورية على الابواب ؟؟؟؟؟؟؟
- حوحو ممثل التحالف: هسسسس...هس....بدك تفضحنا نحن ببلد الامان والضمان والكفالة لمدة اربعين سنة ثانية...ومافي شي من هالكلمة يلي ذكرتها....استعفرالله...استغفرالله.
- يتابع حوحو: صارلي اكثر من خمسين سنة وانا عامل مثل ضابط امن الساحة الكردية مشان ما تخرج عن راي القيادة.....على اخر عمري بدك تعمل مني مرتد عن النظام بكلامك هاد.

فوفو يلتفت حوله ليتاكد من عدم سماعه وهو ينطق بكلمة ثورة وينظر الى حوحو بنظرات السماح والعفو

- انت....انت...معلمنا....اصلا تقديرا لجهودك...سوف اطالب لك بقبر بجانب الاب القائد حافظ الاسد في القرداحة.

- حوحو يتنهد وينظر الى الاعلى: انشالله...انشالله

بعد ان زال رعب الاثنين من صدى كلمة الثورة السورية واستعادة انفاسهم.. يستأنف حوحو الحديث

- انت بتعرف شخص اسمو عمر اوسي
- فوفو: هاد صارلو فترة عم يشتغل مع القيادة في دمشق....ليش؟؟؟
- حوحو: هاد عم يضارب علينا.....بعد تعب سنين من الخدمة.....اخاف يحلو القضية الكردية من خلاله
- فوفو: لا...لا...معلمي...لاتخاف انا تاكدت من القيادة ان هاد نازل على الساحة براتب يومية لا اكثر..يعني عميل بيومية فقط مشان مسألة الاعلام بعيد نوروز...ولدعم توجهنا لاثارة فتنة في الساحة الكردية.

يسود الصمت مجددا....وكلاهما ينظر الى الساعة المعلقة على الحائط ويتنهد في انتظار اللحظة الحاسمة التي طال انتظارها.
يُفتح الباب....ويدخل رقيب في الثلاثينات من عمره، يجلس خلف الطاولة ويبدا بفتح الملفات امامه وقراءتها دون ابداء اي انتباه لهم، يتنحنح فوفو لاثارة انتباه الرقيب لكن دون فائدة.

- حوحو: عفوا سيدي.
- الرقيب يرفع راسه وينظر اليهم مباشرة: قرد ولو...مين انتو....شو عم تعملو هون
- حوحو: سيدي...سيدي...نحن...
- الرقيب: احكي ولك قرد...مين انتو
- حوحو: سيدي....نحن...
- الرقيب ينادي المجند: ولك يازفت ....تعال نزل هذول على المنفردة لشوف
يرتعب حوحو وفوفو وينقذون الموقف بالهتاف بصوت عالي

- بالروح بالدم نفديك يابشار....نحن كلابك يابشار.....صفقتين....ثم يعيدون الهتاف مرة اخرى

يهدئ الرقيب ويطالبهم بالكلام عن سبب وجودهم المفاجئ في مكتبه اثناء وجوده في اجتماع مع المقدم

- فوفو: سيدي عندنا موعد مع سيادة الرئيس.... وعناصر الاستعلامات جابونا هون وقالولنا ننتظر
- الرقيب: نعم...نعم..شو تفضلت....حبيبي شو انت مابتفهم
- حوحو يؤكد كلام فوفو: متل ماسمعت سيدي نحن بلغونا على موعد مع السيد الرئيس وجابونا لهون للانتظار.
- الرقيب يبتسم: قرد ولو....هلق السيد الرئيس بجلالة قدرو...بدو يلتقي معكن
- حوحو: لاتعصب سيدي....مثل مابدك نحن...بـ....بـ.... بخدمتك...و....و...خدمت سيادة الرئيس
- الرقيب: اسمع ولك انت وياه....نحن ما عم ندفعلكم رواتب لتمثلو دور قيادة الشعب الكردي.
- يرد الاثنين: نعم سيدي
- الرقيب: لكان بتنقلعوا هلق بوجهكم على القامشلي.....وتقنعو الشعب الكردي ان نحن رح نحل القضية الكردية ونعطي الجنسية للمجردين منها....وسيادة الرئيس....الله يخليلنا ياه....رح يتكرم ويتصدق عليكم ويزيدلكم الرواتب، ويراعيكم شوي بالديون الزراعية، ويشحدكم شوي مازوتات
- يتابع الرقيب: كمان قبل ما انسى....هالسنة مارح نقتل حدى بعيدكم.... ورح تقوم الاجهزة الامنية بتجهيز مسارح الكم وتخصيص اماكن للاحتفال......وقبل ما انسى نحن بلغنى التلفزيون السوري يطالعو العلم الكردي بشكل غير مباشر في برنامج مرحبا صباح ... الوانكم هي الاخضر والاحمر والاصفر...مزبوط
- حوحو: مزبوط سيدي....الله يكثر خيركم سيدي....الله يديمكم فوق روسنا...ويطول عمر الرئيس ويكبر الامير حافظ بشار حافظ الاسد
- فوفو: يزغرد من شدة الفرح...ويراقص حوحو فرحا بالمنجزات التي حققوها بنضالهم السري مع الاجهزة الامنية.

قصة حقيقية من مزبلة التاريخ....لم يعد لها قيمة على ارض الواقع....لم اذكر فيها اسماء لكي لايتهمنا البعض بالاساءة الشخصية لهم.

تعيش الثورة السورية، ويعيش الشباب الكرد الذين لن يرضوا بالذل والخنوع، ولن يرضخوا لمخططات اجهزة البعث القمعية واعوانها الذين تمتطيهم، ولن يسمحوا لحفنة من اشباه القيادات العميلة باهانة شعبنا الكردي وتشويه تاريخه المشرف.

dostocan@gmail.com
http://www.facebook.com/
http://www.elaphblog.com/dosto