جواب للبلد

ضــــل الـضـحـى الــرامـي ..
وشــمــس شــتـويـة دفــايـة ..
وريـحة الـبن ، لـما يـفوح فـي قلاية..
وفــــــــروة جـــــــدي .
وسبحة جـدي لـمن جـيت أمـد يـدي :
(جــــدي.. أديــنـي تـعـريـفة )..
(بـتـقرا الـحـمدو يــا الـمـبروك )..
(بـقـرها وشــان تـعـريفه الـقـاه)..
بــجـود فـــي الـقـراية كـمـان ..
منك يـــا يـمـة والله زمــان يا يمة .. !
وســبـحـة ( بــنــت الــفـكـي)
والــطــوريـة .. والـــواســوق..
وسـعف حـبوبة ، والحنقوق
وصــوت ( سـعدية ) بـت جـيرانا ...
تـشـحـد لـيـهـا فـــي طـايـوق.
وصـوت (عرفه) لما تخمج الدلوكة غناية...
الصور جوايا محفورة
الصــــور مــحـفـورة جــوايــا.

ولـــي الـلـيـلة ، ولـــي وبــــعــــد بــــاكــــر..
شــان الـزمن غـدار ومـا مـعروف..
زمــــــــن مــــكــــار ،
زمـانـا كـلـو خــوف فــي خـوف
بـــدور أجـيـك يايمه ضــاقـت بــيـا يــا يـمـه هـنـا
بـشـتاق يايـمـه لـي مـلاح الـنعيمية..
وريــحــة صــاجـك الـمـحـروق
ولـــمــا تــســوي طـعـمـيـة
وغـــــبـــــاشــــة روب ،
وعــــنــــزة حــــلــــوب

بــــدور أجيك أتــمـسـى بـعـيـونـك
وأصـابـحـك يـــا حـبـيـبتي أنــا
اتـــاري الـدنـيـا مــن دونــك...
شـيـنـة ومـــرة وحـــارة زي الــنـار..
ولو دورتي احكيلك عن حالي في البندر ،
أبدا بس من وين ؟؟
مـــا شـيـتـا غـريـب وعـجـيب
ده شـيـتا كـلـو شـيـن فــي شـيـن
هــنـا الـــزول الـعـديل ونـصـيح
وحــاتـك انـــت يـــا الـغـالـية
بـــعـــيــش حـــيــاتــو...
بــــي وشــيــن..
وزولــتــي الــحـتـي حـبـيـتها . يما وكان شفتي يا
لـقـيتها بــلاي ، تـحـب زولـيـن.. .
يـــا يـمـه والله زمــان وأيه !!
دقشة عيني من النوم
معاي بشيل هموم باكر
قبل ماأشيل هموم اليوم !!
أختها خطواتي الأولى
أعدي الباب..
تبدا تدق طبول الهم..
خواطر تذهل الألباب !!
وأقالك ياشوارع الجن ..
وفي جوايا حاجة تئن
أشد وتر الحزن وأعزف
تموت غنواتي يايمة
ويخنقني الغنا وأنزف
وتنتر في العروق حمي
خيال بيتنا القديم يرجف
صور تنزاح وتتلم
وتناي تالت آيمه !
واشافك بي خيال حالم
وتشاوري وترقص السبحة
ملامح العابد الصايم
تشع فوق جبهتك سمحة
وشييك يحاكي ضي في النور.
مزدان يمة في الطرحة
وتبسمي لي
أمد إيدي
أقول أتلاقي يا السمحة..
يتلاشي الحلم وأصحي
ويدفق عرق مالح
ويسكن فيني كل الهم
واشم ريحة ندم جارح
وارفس عصفورة منجرحة
فارقت الفضاء البارح ..
وتناي وتالت آيمة !!
وهم كل المداين وهم ..
وهم غرقانة في زخم الحضارة الغم
حضارة بتحصد الإنسان
وتزرع في مكانة نغم
وقصد القول .. ياشيل اللوم
وياجابني للبندر.
وحاتك إنت يا الغالية
ده يوما شوم..
ولا بنسي الخجل من راسي لي كرعي
شايلو وأحوم..
وهاي الحالة في (الخرتوم)
زي عايش شقي ومهموم

(كلمات الشاعر : التجاني الحاج موسى )