يا كدابين يا كلاليب يا حمره

يا كدابين يا كلاليب يا حمِره ..
دلوقتي أنا عرفت إنكم يا مصريين كدابين دايما بتكدبوا علي الحكومه وبتقولوا إنكم فقرا ومش لاقيين .. طيب أنا حا أعرفكم كدبكم يا كلاليب ..

كلكم بتجروا ورا الأتوبيسات وتركبوها علشان زحمه وانتم بتحبوا قله الأدب في الزحمه ..

طب يا كلاليب ما عندكم مصنع شيروكي والا مصنع مرسيدس في مصر ياللا إمشوا وروحوا إشتروا عربيات شيروكي ومرسيدس وبطلوا تركبوا الاوتوبيسات وقله الأدب في الزحمه ..

حاجه تانيه .. ساكنين في عشش صفيح وعشوائيات وكل عشره بيناموا في أوضه زحمه وقرف وريحتكم وحشه والمجاري طافحه من اللي بتعملوه وبعدين بتخلوا ولادكم يلعبوا في ميه المجاري يا معفنين يا كلاليب ..

مش عارفين إن مصر أكبر دوله في العالم فيها منتجعات وقري سياحيه وكمان ضواحي فاخره ..

اكيد عارفين يا كلاليب الساحل الشمالي وساحل البحر الأحمر وساحل سينا والرحاب والشروق ودريم لاند والقاهره الجديده وغيرهم كتير فيهم كام وحده سكنيه ما بين شقه وشاليه وفيللا ..؟
فيهم 120 مليون وحده يا معفنين يعني كل واحد منكم عنده وحده ونص .. وِحده مش وَاحده يا كلاليب .. يعني ممكن تكون شقه ونص شاليه أو نص فيللا من أصغر عيل بيلعب في قله الأدب لحد أكبر شحط منكم ..

بس إنتم كلاليب وعاملين نفسكم فقرا أيوه بتدعوا الفقر علشان الحكومه تديكم روزبيف وكافيار ومارونجلاسيه ببلاش إنتم وعيالكم المعفنين المأملين المبرغتين ..

يااللا يا كلاليب كل واحد ياخد مراته والعشر عيال الجربانين ويروح الشاليه بتاعه علي البحر ويخللي عياله الجربانين يستحموا في البيسين أو البحر علشان ينضفوا وريحتهم تبقي كويسه وما تنسوش تحطولهم برفان دولتشي جابانا ..

وما تفتكروش إن الحكومه هابله حا تدفعوا حاتدفعوا الضرايب العقاريه يا كلاليب ..

وبعدين عمالين تصرخوا وتقولوا اللحمه البقري بقت بسبعين جنيه وكرتونه البيض بقت بعشرين جنيه ..

يا كلاليب علشان انتم بتوفروا وبتاكلوا لحمه بقري وبيض مزارع جاتكم القرف روحوا إشتروا لحم نعام وكلوا بيض نعام وإنتم حا تلاقوا اللحمه البقري وبيض المزارع رخصم علشان دول بتوع الجربانين بس اللي بيحوشوا ويوفروا ..

وكمان يا كلاليب عمالين تتشكوا وتقولوا الكهربا بتنقطع بتنقطع .. طيب الحكومه تعملكم إيه كل واحد فاتح تلاته ايركوندشن واربعه ايركونديشن في العشش الصفيح وساحبين الكهربا طب عايزين الحكومه تعملكم إيه يعني لو الحكومه بتاخد منكم الف جنيه في الشهر كهربا كلكم يا كلاليب حا تقفلوا الإيركونديشنز وترشوا جردل ميه علي الارض وتناموا عليها يا كلاليب يا معفنين ..

إنتم فكرتوني بطنط ماري أنطوانيت لما الكلاليب الفرنسويين راحوا يقولولها مش لاقيين العيش الحاف ..

طنط ماري أنطوانين قالت لهم يا كلاليب عندكم جاتوه روحوا كلوا جاتوه يا معفنين …

قولوا بقي مش لاقيين الجاتوه ..!!!!!!!!!!!!!!!!!!!!!!!!!!!!!
مجدي المصري