يا رب

يارب انته الغفور وخسران مين سابك

افتح لينا يا كريم للمغفرة بابك

جينا نتوب م الذنوب والشيله دي تقيله

يا رب كرمك علينا دا احنا أحبابك

يا رب أنت المفرج والعبد دا مكروب

شايل ذنوبه جبال خايف قوي ومرعوب

طالب يا رب رحمتك انته الغفور يا رحيم

طمعان يا رب في جنتك امحي يا رب ذنوب

يا رب مؤمن بقدرك مؤمن كمان بالغيب

بعمل خطايا كتير والناس تقوللي عيب

لكن شيطاني غواني مالك زمام أمري

بدعي يا رب بتوبه دا انته مني قريب

يا رب بسجد واصلي وأطلب التوبه

ذكرك في فمي تمللي اغفرلي دي النوبه

اهديلي نفسي يا ربي و حببني في الطاعة

اقبل رجايه يا ربي دا الجنة مطلوبه

تأليف الشاعر نادر الأسيوطي