ياريتني لو أقدر أبوح:

ياريتني لو أقدر أبوح:

ياريتها لو تدي الظروف
حبة مساحة لقول يفوح
يشفي الصدور ويروق الحشا والعقول
يعْدِلْ طريق .. يدور الباجور يروح
ياريتها لو تسمح تشيل
رقراقة من ضل السمح
الكان وكان في عهد فات
وعهد ماشي وعهد خيراتو بتلوح
تجيبها بي رأياً صريح حارنو يفيد
سبوبة لزولاً قبيل خاتنو روح
ويجينا خاطر من حبيب فالو المطر
يبلبل الاشواق ينسينا الجروح
نرفع شموخ من تاني
يااااا ود جابر الام الرؤوم
ما بتسألي؟
هانت عليك علل الولاد
تنخر عظام.. وتشوه الحال والوجوه
ياريتني لو اقدر ابوح
بى همسة او بى صوت جهور
يشاقق الدجى والدروع
ما بتفيد .. راعومة الجيل والخدار
تأثيرها شين.. دكوكة الناس والبلود
مضارها عالي حقيقة بى فوق للقموح
وحالها حال زولاً يروح ينسى التباريح القبيل
وينسى خيرات من رجال صنعوا السفوح
وجُبلنا شان نسنى القديم ومآسي مرت من قريب
ودا رحمة من رب الجميع
بيها النفوس تقدر تواكب بعض حالاتها وتعيش
وتلملم الاحزان توديها المزابل والتواريخ الرواح
وانا مانى غرقان فى التمنى ..
الا بى نصحاً قديم قنبت ابوح
لا ترجى خيراً من زويل
ساعدتو جاد في وقت غاب
وكتين يفرهد .. ويقوى عودو بيجهلك
ينساك .. وينسى صنيعتك
ينسى اللكان بينك وبينو زمان وينسى ويحقرك
بس انت خاويهو في حدود
لا توهط البال والأمل.. حاسب حسابك ما تتوه
محبتك.. ما تخزلك .. تعرض تجاهو تذكرو
يزداد عناد.. ينكر جميلك
يستكين ساسو ومهيدو ويزدريك
ويكَمل الواسوق كواريك واندياح
جاه العبوب الزاد رزق
ما الزول خلاص.. اتعلم القول والفعال
وشنو اللخاتيهو ينقصو
الا الحصيف..
حاشاهو ينسى يقلد الزول الجنوح
والقول بقول .. خليكا لو ما بتستحي
كل الخصال تتماشى فيك
صالح وطالح ما مهم.. انت المخير
وربنا الخالقنا موجود ما بروح

عمار..........
gadamar170@hotmail.com