ياثوب صبري

ياذيييب لاتقنـب بعـد ماتواريـت
الليل طول والفجـر غـاب والهـا

ناديت لك ياذيب ناديـت ،ناديـت
وأنشد نجوم الليـل عنـي وسلهـا

مليت من كثر المعاميـل وأزريـت
والهييت وضلوعي من الشوق ولهـا

ياليل ويـن الصبح،؟ياليـل مليـت
تكفى تحث خطـاه تمشـي عدلهـا

لامر بي صوتٍ من الصـب لبيـت
وبريـت للجابـه ضلوعـي بدلهـا

أمشي شوي ولا تعشمـت لديـت
ومشاعري ماهي عن الضيـم دلهـا

الشوق نار ودمـي المحتـرق زيـت
البعـد ينفخهـا وذكـره شعلهـا

ياليتنـي فـي طرقتـي ماتعنـيـت
ولانهيـت اقداميـة عـن مهلهـا

يضيـق صـدري والهنـا ماتهنيـت
وطرايدي مدري وش اللـي جفلهـا

ياناب حظي لاتكشـر ولاأدميـت
ولاتصيـد إلا لقـم مـن نثلـهـا

وإليا نشدتك قلت راغت وغريـت
وعشمتني في صيدةٍ منت بـ إلهـا

ولو الهقـاوي فالزمـن ماتهقويـت
غرايبه تصعـب علـى مـن جملهـا

الصمت (جمرة) والأمانـي الا ليـت
ماتسعف إللـي غايتـه ماوصلهـا

والوقـت هيـن ليتنـي ماتذريـت
فـي سـد هقـوه ماتـذري ضللها

مدري لكنـي فـي زمانـي تعنيـت
من حاجةٍ وبـل الجهـد ماغسلهـا

ياثوب صبري ضقت والا تشمريـت
والا أزعجتك احلامنـا مـن مللها

معاد لـي غيـرك عُـزا لاتعزويـت
أقنـع بربـات العنـا فــي حللها

لاتشتكي لي !!أنت مزري وانا أزريت
هيا نبـا نبكـي الحظـوظ وطللها