وينك يا عمر؟

حلم النظر طول العمر ماغادر اذهان الكفيف
وانا الكفيف اللي تحاصر ذهنه أحلام النظر
نصف العمر عشته ضرير أعمى على جنب الرصيف
والنصف الاخر صرت أ عيشه في رجى حلم العمر
اذكر قطيع الريم وانشد عنك يا وادي ثقيف
وانت اختفيت من الخريطة كن ما باقي اثر
من ينصف اوراق الشجر من بعثرة فصل الخريف
ويكبل يدين الخريف ويجمع اوراق الشجر
يا شجرة الصفصاف.. أوراقك تساقطها مخيف
طاح الورق واستوحشت قمرية الغصن الخضر
استوحشت قمرية الوادي وغنت يا لطيف
وانا وقفت اسمع لحنها واستمع له واعتبر
اثر الطيور تحس با الوحشه بعد فرقا الوليف
واثر الحنين يهز قلب الطير وقلوب البشر
يا سيدة كل البنات ودرة الجنس اللطيف
يا دانة ما جابها بحار من سابع بحر
اما اقبليني ضيف دائم واكرمي مثواي ضيف
والا افتحي باب الصدود وقفلي باب العذر
احسني اضعف قوي واحس بك اقوى ضعيف
والريح خلف النافذة تعوي وانا تحت المطر
كيف انتظر والانتظار امضى من السيف الرهيف
والعمر يمضي والثواني جمر والساعة دهر
لقيت مفتاح الفرج في قبضة الصبر العنيف
لكن وين القى ولو دورت مفتاح الصبر؟
الصبر اقله حد خنجر قاطعه واقواه سيف
اشده الموت البطي واقله الموت الحمر
الوذ به لوذة طريد القوم في وجه الحليف
ويردني بين الرجا والياس لقيود الاسر
جيته وانا خوفي على صدري من طعون العطيف
واقفيت من عنده وبي عشرين طعنه فا الظهر
والظلم للعاشق قهر والعدل للمظلوم ريف
من جرب الحجاج صاح وقال وينك يا عمر؟