وهي تنضو ثيابها!

علـى عرشهـا بلقيـس كـل ٍ يهابهـا
ويخشى غضبهـا ويتمنـى اقترابهـا!
تقربت منهـا زادي الخـوف والرجـا
وهي في ظلام الليـل تنضـو ثيابهـا!
يا كم شاعر هوجس بهـا طمعـة بهـا
وانا هاجسي قبل الهواجس سرى بهـا!
مع الليل كن المـوت خلفـي وامامهـا
ترى الموت في عيني واراه بخضابها!
جفول وذعـور وكـل حاجـة تريبهـا
لو يهـب نسنـاس الهباهيـب ارابهـا!
ركضنا على غـر المعانـي وناحـرت
وساع الفجـاج اللـي تعـاوى ذيابهـا
فـلا نوهـا يرجـى ولا ظلـهـا ذرى
ليـا شحـت بماهـا تجـود بسرابهـا!
فجاج يهم الذيـب فيهـا مـن العطـش
يشمشم حصى الحره ويلحس ترابهـا!
هي الفكرة المستعصية كيـف اجيبهـا
وانااللي عصتـه المستحيلـه وجابهـا
على محبرة من نور والحبر ضوءهـا
بسيطـة ولكـن مستحيـل انسكابهـا !
كذا يا طلال الشعـر واديـه اضاعنـي
بمكة وانا ادرى مـن اهلهـا بشعابهـا!
فكم من غريـب ٍعـن بـلادٍ احاطهـا
وكم من مقيم ٍفـي بلـد مـادرى بهـا
عدلت رقبة عوج المعانـي وطاوعـت
فهل يا تـرى الايـام تعـدل رقابهـا؟!
ارى حاجتي تعطى لغيري وانـا الـذي
عطوه العوض فيها وهو ما رضى بها !
ليا اخطا الزمن كبد الحقيقـه وصابنـي
فانا اللي رمى كبـد الحقيقـه وصابهـا
تعلمت قبل الشيب يغـزي عوارضـي
وجربت قبل النفـس يـذوي شبابهـا!
ومن يامن الدنيـا واهلهـا ليـا اهتنـى
ستبـدي لـه الايـام مافـي جرابهـا!