وما الحياة إلا شوية ورق

 وما الحياة الا شوية ورق
ورق بوسطة
ورق جرايد
ورق محاضر
ورق الرخصة
ورق البطاقة
ورق النقابة
ورق ورق ورق ورق ورق ورق ورق ورق حياة ورق
ومنقدرش ننسى ورق العنب .. ومنقدرش ننسى ورق البفرة .. ومابين كل ورق وورق شوية ورق
علشان تزاكر وتجتهد .. هتزاكر على ورق
علشان تبنى حياتك فى مصر لازم يكون عندك ورق
وعلشان الناس تعظملك وتقولك يا بية .. لازم يكون ملكك ورق
وعلشان تطلع كل دول ودول.. لازم يكون عندك ورق
يقولو يا بية انا صاحى قدامك .. يقولو بس انت قدامى ميت عالورق
ويقولو انا فاهم وعهد الله شغلنى بس .. يقولو لازم يكونلك ورق
ميلادك بورق .. شهاداتك بورق .. صحتك بورق .. سفرك وحياتك ونومك وليلك ونهارك حتى حلمك وخيالك .. كلو عالورق
يا راجل دا انت مينفعش تخرج مالدنيا الا بورق
وناس ماسكة وظايف عالورق
وناس متجوزين بس عالورق
فنانين ومهندسين وصحافيين ودكاترة ومحاميين مش فاهمين .. بس معاهم ورق