نفسي في طاجن بامية

نفسي في طاجن بامية

وحلة رز علي ملوخية

محتاجين ايه دول يا ولية

شوية زفر وحتة لية

طب نجيبهم ازاي دول يا سنية

والحكومة علينا مفترية

وخصوصا بتاع المالية

طب أدي صوتي لأبن فتحية

بيقولوا بيوزع لحمة ولية

وكمان فراخ مشوية

علشان الأنتخابات الوهمية

ولا نشوف الجمعية

بيقولوا قليلة النقدية

وحاجتها لسوء التغذية

آه آه...يا ام الدنيا

دي آخرتها فيكي يا غالية

نستنا اللقمة من ده ودية

واحنا اللي ارادتنا كانت قوية

وكنا نهد الجبال في ثانية

خلاص جابولنا سوء تغذية

وبقينا في حالة رزية

بسبب ولاد المفترية

وحقوقنا المنسية

يا ترى يا بلدية

في يوم ها احقق الأمنية

واكل البامية والملوخية

واضرب سلام للجمهورية