ميعاد الشراقة والغرابة

 
ميعاد الشراقة                                                                                                                                                                                                                    جلس مستشارو القبائل  الجدد وأولاد المستشارين القدامي  وغرابة بنغازي ود رنة وطبرق  والأفندية موظفي الحكومة  وقدمت لهم قصاعي الرز ولحم الخروف الليبي موش اللحم المكفن ولبن النياق ، وبعد أن أكلوا وحمدوا الله غسلوا اياديهم  . وبعد ذلك  قمعزوا وبدأ الميعاد وقدم أتناؤه طواسي الشاهي الأخضر .
المستشارأبو علي :- ياجماعة شرفتم الميعاد  واليوم نبوا نحكوا على حال البلاد بعد مقتل المقبور القذافي والتخلص من حكومته السفتولة .
المشتشار أبو محمد :-  يا جماعة الملك مات الله يرحمة والمقبور القذافي خزاه الله قتلوه الثوار  وزعمك منه ألي بيحكمنا  اليوم .
ولد المستشارالمرحوم بو حميدة :- الطرابلسية متحزمين ويبوا يجيبو واحد مقطع أشبح  سوسماه ، وشاء الله سماه يكون مقبول جابونا في الماضي واحد ضابط إسمه معمر تحشمنا حتى نقول إسمه قدام أولادنا .
غرباوي درنة :- الطرابلسية يبوا  البلاد موحدة بيش يحكموا فيها لان ناسهم هلبة  ولما يديروا إنتخابات  ينجحوا كلهم غرابة  وإحنا نقعد على الفاضي محكومين كما كنا في عهد المقبور .
المستشار أبو على :- والله صدق غرباوي درنة هو يعرف الغرابة أكثر منا .
غرباوي بنغازي : بيش إنفوتوا اللعبة على الطرابلسية نطالبوا بالفدرالية متع زمان التي ألغاها الملك الله يرحمه .
المستشار أبو مسعود :- صح أفيمك ونقسموا البلاد إلى ثلات جهات برقة وطرابلس وفزان  وكل جهة لها نفس العدد من النواب في البرلمان بيش نواب برقة ونواب فزان يكونوا الأغلبية ونجيبوا الحاكم إلي نبوه  والطرابلسية كان قبلوه باهي كان هذا ننفصلوا ونديروا دولة كيف جنوب السودان .
ولد المرحوم المستشار ابو رحومة :- فاتتكم حاجة البترول كله في برقة وفزان ولما إندير الفدرالية ناخذوا إلي نبو من البترول ونعطوا شوية للطرابلسية . وهكي برقة تبدى زي الكويت  نصرفوا أحنا وأولادنا ونتعالجو  في بلاد  بره  ونعلمو أولادنا  في مدارس إفرنجية  ونديروا سيارات المرسيدس والجقاور ونبنوا القصور والعمارات كيف متع الأمارات  كاط على كاط إلى السما .
غرباوي بنغازي - والتجارة تكون كلها عندنا  ونستولي على أسواق برقة  وأسواق طرابلس وحتى أسواق فزان  وكل الوكالات تكون عندنا .
المستشار أبو محمد :- غرباوي بنغازي تاجر ما يفكر غير في التجارة فغرابة بنغازي ودرنة وطبرق واكلين  اسواق برقة وأصبحوا تجار كبار وداروا الملايين وقعدنا أحنا  القبائل على المعاشات  يا دوبك تكفي مصروفنا .
غرباوي طبرق :- والله لولا الغرابة  ما عمرت برقة ما أحنا الغرابة جينا وعمرنا ها وأصبحنا برقاويين ..
المستشار أبو علي :- والله صحيح  حتى في العهد الملكي كان معظم وزراء وتجار برقة من الغرابة  لكن والحق يقال هم متعصبين لبرقة أكثر من سكانها من القبائل .
غرباوي بنغازي :-   توا الشيخ رايس المجلس الأنتقالي لينا  وبيش نوصوه يأخذ باله بيش ما يزلبحوشي الطرابلسية وأحسن هو يقعد رايس البلاد حتى بعد الأنتخابات .
المستشار أبو حسين :-  والله رايس المجلس الأنتقالي بيحب الطرابلسية لأنه قعد عندهم مدة طويلة  لكن  الدم غلاب ما يرضاش في برقة وهو خير من غيره .
المستشار أبو محمد :- والله مش عارف كيف سكان فزان حارتين يكون عندهم نفس النواب والوزراء كيف  سكان طرابلس الي فيها خمسة مليون نسمة .
غرباوي درنة :- وليش لا في أول أيام إستقلال الملك  جابوا عشرين للجمعية التأسيسية  لبسوهم جرود وكيطان وفرامل وكنادر  وكانوا أحسن منظرهم من الطرابلسية بطرابيشهم متاع الترك والبراقوة بشناتهم . وجابو ثلت أعضاء مجلس الشيوخ وصبح منهم واحد رايس حكومة . وتوا زاد عددهم   فمن هذه الناحية متخافوش يجيبوا حتى التوارق من النيجر ومالي ويسكنوهم في فزان .
المستشار أبو محمد :- والله حتى برقة سكانها شوية بالنسبة لطرابلس  وفي العهد الملكي   أخذت ولاية طرابلس منطقة سرت وهي كلها أرض قبيلة المغاربة البرقاوية ولهذا يجب ضم سرت وشرقها الى ولاية برقة بيش تكون قبيلة المغاربة موحدة  وسرت بعيدة على طرابلس وحتى علي مصراتة  .  وبينهم صحراء قاحلة .
المستشار أبو علي :- خلينا  نجمع مطالنا توا ونعلنها  فدرالية من ثلات ولايات كيف ما كان في  العهد الملكي   وأعلان برقة ولاية في إتحاد ليبيا  من توه  ورايس المجلس الأنتقالي  يستمر رايس حتى بعد الانتخابات . وضم أقليم سرت والخليج إلى ولاية برقة  وإعطاء طرابس 10% من البترول بيش يعيشوا.
المستشار أبو علي :- خلاص إتفقنا وبلغوا هذا الكلام إلى المجلس الانتقالي .
ميعاد الطرابلسية
إلتموا كلهم من مجالس المدن ومجالس الثوار ومشيخ ترهونة ومسلاته والمنطقة الشرقية ومصراتة ومنطقة الجبل الغربي والأفندية موظفي الحكومة  وقعمزوا كلهم في حلقات ستة ستة وجابولهم قصاعي الكسكسي والعصبان ولحم الخروف ولحم الدجاج  والطرشي  ومية بن غشير  وبعد ما كلوا وحمدوا الله  قعمزوا للميعاد .
ممثل مدينة طرابلس :- سمعتوا الاخبار يا  حاضرين  جماعة برقة داروا لمه وقرروا يحولوا البلاد الى فدرالية متاع زمان التي حاربها الزعيم السعداوي الله يرحمه  حتى طردوه من البلاد وحبسوا جماعة المؤتمر وفرضهوها علينا في الأول لكن الملك إدريس رحمه الله رجل عادل شاف إن الفدرالية  ما خدمتش برقة فألغاها  بيش تكون ليبيا بلاد واحدة .
ممثل مصراتة :- والله جماعتنا المصارتة  متاع  بنغازي عجبتهم الفدرالية وداروو بيزنس  ووفاريات في العهد الملكي وخشوا في القبائل  وما يبوش المصراتية والطرابلسية  من الغرب ينافسوهم في برقة  وهم مصدر البلا ، أما جماعة القبائل فكانوا فرحنين بالمعاشات  متع المحاربين القدماء والحواشين وما يبوش حاجة ثانية غير ما يمسولهمش الأرض ومزارعهم التي حولوها الى  ومراعي للابل  والغنم . وإذا كان داروا فدرالية حتى إحنا  مصراتة نبو نديرها ولاية وهي واتية عندنا .  وقد أقمناها قبل برقة بس ما تكلمناش  عليها حتى تتحقق بالدستور .
ممثل الزاوية :- أيوه هذا كلام قديم البراقوة  في عهد القذاقي كلهم بعثوا ولادهم ليتعلموا في بلاد الانجليز والأمريكان  وتوا عندهم متعلمين ودكاترة أكثر من الطرابلسية  لكن جري فيهم دم أبهاتهم كلهم فدراليين  ويبوا يتولوا الحكم والتجارة ويمصوا البترول . والزاوية والمنطقة الغربية منطقة واحدة  وفيها مصافي وأنابيب الغاز  ونبوا إنديروا حتى إحنا ولاية زي طرابلس وبرقة  ومصراتة مش خير منا .
ممثل الجبل الغربي :- والله إحنا ما شاقي بينا حد   جماعة طرابلس واخذين كل شئ حتى اللغة الأمازاغية منعوها   وضيقوا علينا وبدوا يرضوا في ناس برقة لأن عندهم البترول  وموش مهتمين بينا .  وطلعونا جماعة جدد هم الزنتان وحاسوا فيها إستولوا على طرابلس  وعينوهم وزراء وسفراء  ونسونا إحنا ومن أمتى الزنتان مسميين .
ممثل ترهونة :- ياناس البترول معظمه في أرض برقة وأرض فزان ولو دارو ا فدرالية قعدنا حبقي ,  لكن الأمريكان والأجانب يحبوا طرابلس لأنها مدينة أوربية وجميلة وقريبة من طاليا وفرنسا  والطليان علمونا الهوتيلات والمطاعم الباهية والمكرونة  والزيتون المفزخ والجبنة البرمجانو  وكل حاجات الأوربيين  متوفرة فيها والامريكان والأوربيين ما يحبوش بنغازي قالوا بلاد سبخة  مش صحية  وما فيهاش مدارس لتعليم أولادهم ومستشفى شركات البترول في طرابلس  والمشروبات كلها متوفرة  في طرابلس  وبنغازي خشوا فيها المصريون وجابولهم الفول والطعمية  والبليلة والعيش البلدي وأصبحت بنغازي زي صعيد مصر ،  حتى اللباس أصبحت جلاليب مصرية .واللبس القديم الجرد والفرملة والشنة مصنوعة في الصين ما زالت عند القبائل بس . لكن القدافي خلا كل ليبيا سحاتيت سورية (فوري يسموها الطليان ) وسروال ويطلعوا بيهم في الشارع  من غير حشم . وين ايام زمان أيام الجرود والراس مغطي بالطاقية ولا المعرقة  والبلغة المغربية الصفراء .
ممثل طرابلس- وخيرالأمريكان والأنجليز والفرنيس يناصروا الفدرالية ؛-
ممثل ترهونة :- هدبم ولاد أمهم يبوا بترول برقة لأن برقة سكانها شوية ما يقدروش يصرفوا فلوس بترولهم كلها ولهذا يستتمروها في لندن ونيويورك وباريس  جي ما داروا مع دول الخليج ولو خلوها وحدة يصرفوها الطرابلسية، ويلهطوها  تجار مصراتة . وفي نفس الوقت  الأمريكان والأوربيين يبوا يسكنوا في طرابلس لأنها مدينة أوربية  وقريبة على  طاليا ومالطة وأوربا كما يقولون  أي بيضربوا عصفورين بحجر واحد .
ممثل بن وليد :- والله إحنا رزقنا طايح . جي القذافي ودار حركة في البلاد وعين أولادنا في الحكومة و جندهم في الكتائب  واللجان الثورية  ودار لنا مشاريع ، جوا الثوار وسحنوننا وقتلوا أولادنا وطيحوا حيشاننا  ولهذا حتى إحنا نبوا أنكونوا ولاية  بش مش مع مصراتة . 
ممثل طرابلس :- ياجماعة حشمتونا  وكل واحد يتكتم عن مدينته ودايرين قوة ثوار تساندكم وتتعاركوا مع بعض . كيف برقة بتقبلكم وأديرمعكم وحدة وأنتم كل واحد عامل دولة من ايام الحرب مع الطليان وإستغل القذافي خلافاتكم  وقسمكم  بيش يحكم واحد بواحد . وخلونا نبلغ سكان برقة والمجلس الأنتقالي  ونقولولهم  إحنا أغلبية سكان ليبيا ونبوا ليبيا موحده كما دارها الملك إدريس الله يرحمه . والفدرالية هذي إنتهت . ونديروا مكاتب  للحكومة في كل مدينة  بيش تتعامل قريب مع الناس  ومايديروش سبلة ويقولوا إحنا مهمشين  . ونهتم ببرقة وفزان  وجبل نفوسة والجبل الاخضر، ونعمل فيها برامج للتنمية  وننتخبوا برلمان واحد وحكومة واحدة  ورايس واحد  برقاوي ولا طرابلسي ولا فزاني .  موافقبن  ؟
  الحاضرون :- موافقون وبلغوا هذا لبرقة والمجلس الأنتقالي والحكومة .