مقطوعات زجلية ,, رابح التيجاني

راعي النهاية

رابح التيجاني

                     علاش خليتيني نتعلـق بيـك

  وبكلمة منك نربط مصيــري  

                   علاش النفاق وكدوب عينيـك

    يلا كان قلبك مبيوع  لغيــري

                            كان عليـك  تقوليهـا

           من.الأول.تقوليها

وما كاين لاش   نعيشو الخداع 

                   انا نسامـح فالدنيا ومـا فيهـا

وما نرضى تكون المحبة قنـاع

      احياني يا وعدي والولف خداني

وخـا حبـك تمثيــــــــل   ف تمثــيل

     لاش طيبة قلبي وصدق وجداني

مخدوع بسرابك وحالم بالمستحيل

                   لطفـك حيلـة وجمالك وسيلة

وغرورك يا وعدي خداك بعيـد

                      فكـل كلمـة وعـود جميلـة

 ومع كل بسمـة    عاشـق جديـد

                 لكـن آش تعمل بقلب مجروح

 وباش تفيدك تجارب      بلا غايـة

              اللعب ماشي بالعواطف والروح

ويلا تسليتي لحظة راعي النهاية.

  ألحان وغناء المطرب الفنان رشيد السباني

                  ويلوموني يلا حبيت

 وبلا بيك لاش انا فهاد الدنيا

ولاش ليها جيت 

                ويلوموني يلا غنيت

وانا يلا ما كنت انت غنايا

بحال يلا ما غنيت

              انت راحتي يلا عييت

 وانت غايتي يلا جريت.

                        انت انغام عودي

            أنت معنى وجودي

     أنت ضامنة خلودي

انت ونيسي يلا شقيت

وضحكي يلا بكيت

                   أنت الحب والأغاني

تعطر فضاء البيت

        الله خلقنا ولهمنا الحكمة

      وجعل ما بينا مودة ورحمة

 هاد الدنيا بالحب الف نعمة

  نعيشو للخير ندركو الأسمى

هاد العالم بالحب وحدو بسمة

    وكيفاش ما تكوني حديث

وكيفاش ما تكوني نغمة

وعلاش ما نقول حبيت

علاش ما نقول حبيت

،لحنها نعمان لحلو ، وغناها محمد رضا