مش مهم إنت مين

إمسك قلمك
إكتم ألمك
أوعى تقول للظلم آمين
حقق حلمك
إعلن رأيك إ
إ كتب على صدرك ثايرين
المهم الفكر ايه
مش مهم الإسم مين
والمهم كتبت ليه
مش مهم تكون منين
المهم كتبت ايه
مش مهم كتبت فين
ليك فؤاد عمال يدق ؟
ليك حنين للناس يرق ؟
ليك دموع نازلين مطر؟
ليك أحاسيس تنفطر؟
ليك ايدين ماسكين زهور؟
تبقى انت أكيد بشر
لو بقيت للحب ضد
أو بقيت للظلم يد
تبقى شيطان ولابد
تنكسر وتضيع هدر
لو بقيت للعدل مانع
او بقيت للحق بايع
تبقى فعلأ فى خطر
لو كرهت الناس تملى
أو عاديت إنسان بيصلى
تبقى ضعت ولا مفر
لو تكون انسان بحق
قول فى وش الظلم لأ
أوعى تصبح نبع ضر
أوعى تتسبب فى شر
وبإيديك ضمد جراح
خلى أيامك سماح
قوم و نادى بالصلاح
قوم وعوض اللى راح
أيوة صمم وانتصر
ضم صدرك للوطن
وبأيديك إرسم أمل
أوعى تلويك الرياح
إبنى فى الأطفال كرامة
علم الناس السلامة
واجعل الظلمة صباح
خد من الماضى جماله
مش تسلم له بحاله
ده عبير الصبح فاح
مصر يا بلد الحضارة
يا حبيبتى يا منارة
فجر أهل العلم لاح
فجر أهل الفكر لاح

من ديوان الحب فى الهجير
ل حسن أحمد عمر