مش كفايه الضرب علي القفا

والله العظيم أنا مش عارف الحزب الوطني و نوابه عايزيين منا ايه؟؟؟؟ مش كفايه اللي هما عاملينه فينا من ظلم وفساد للناس اللي مش بتطلب غير القليل من خير مصر الكتير جدا جدا بس للاسف مش لينا .... الظاهر ان الامن و نواب الحزب مش مكفيهم انهم بيضربونا علي قفانا كل طلعه شمس تعبو من الضرب ولا خلاص احنا في نظرهم ولا شىء ..حاجه كده مش معدوده ولا محسوسه سرقونا وضيعونا وضربونا وفي الاخر مش عاجبين والله ما هتلاقو في الدنيا شعب بيخد علي قفاه وبيسكت زي شعب مصر  للاسف شعب معظمه ماشي جنب الحيط وبيقول ياحيطه داريني ... وفي الأخر ياريت عاجب يطلع علينا نائب في الحزب الحاكم(الضارب) ويطالب الشرطه أنها تضرب المتظاهرين بالنار ......... بقي فيه بجاحه وقلت ادب أكتر من كده في الدنيا شعب مصر في نظر النائب الغير محترم بقي رخيص لدرجه انه يطلب من الداخليه انها تضرب المواطنين المتظاهرين بالرصاص ........آه يازمن آه والف آه فوق ال آه مش كفايه الضرب علي القفا اللي الناس مستحملاه لا بقي اللي يطالب بحقه خلاص بقي حرامي ينداس وينضرب بالنار .......... بيقنا في بلادنا زي اللصوص ونستحق الضرب بالرصاص ..... بس لا ياحضره النائب غير المحترم دي بلادنا وداه حقنا اللي بنطالب بيه خلاص الصبر زهق مننا واحنا فاض بينا الكيل منكم ومن أعمالكم أحنا صحيح الغلط عندنا يوم ما انضربنا علي قفانا وسكتنا وضاع مننا حقنا ؟؟؟؟؟؟؟؟؟؟؟ لكن الامور توصل للضرب بالنار فخلاص العمليه هاتبقي ياقاتل يامقتول