السبت صباحاً في إحدى محال بيع بطاقات الخلوي المدفوعة مسبقاً .. طلبت بطاقة زين ودار بيني وبين البائع الحديث التالي:
أنا: فعلا الاتصالات مكلفة يا أخي مش ملحق بطاقات
البائع: له يا رجل الاتصالات عنا مش غالية
أنا: كيف مش غالية وأنا بدي أقل يوم اتصالات بس للشغل بدينار ومرات بدي دينارين وتلاتة ..
البائع: طيب ليش ما تجيب خط مش طبيعي أوفرلك بكتير
أنا: ومن وين أجيبو
البائع: خلي حدا من اخوانك يجيبلك اياه إذا عشان العمر
أنا: اخواني كلهم أكبر من 22 سنة
البائع: طيب حدا من قرايبك
أنا: قرايبي مين ؟؟؟ (باستغراب)
البائع: ابن عمك ولا ابن خالتك شوفلك حدا منهم
أنا: خوالي بغزة والي عم واحد بالشام والي خال بقطر
البائع: يعني ما في حدا من قرايبك (استفزني)
أنا: يا زلمة بحكيلك ما الي قرايب هون ولا ابن عم ولا ابن خال ولا عم ولا خال
البائع: طيب حدا من اولادك الله يخليلك اياهم (هو غشيم بعمري بس شكلو مبين علي الكبر)
أنا: ما عندي اولاد
البائع: الله أكبر وبعدك مش متزوج لهسا (استفزني أكتر)
أنا: مش عارف شو أحكيلك بس خلص مش متزوج
البائع: طيب شوفلك حدا من صحابك ولا جيرانك
أنا: جيراني وصحابي كل واحد منهم شافلو حدا من قرايبه أو حدا من اولاده
اشتريت البطاقة وطلعت من المحل وأنا بنادي على تنين وطني فلسطين اللي ما عشت فيه وشردني الاحتلال وعاش مكاني وبعدني عن قرايبي .. وريم الله يرحمها ويحسن إلها ويغفرلها ويسكنها فسيح جناته اللي ماتت قبل ما نكمل قصة حبنا لفلسطين ونجيب أولاد لحتى أطلب من واحد منهم يجيبلي خط زين "مش طبيعي" .. وهو فعلاً مش طبيعي لأنه قدر بعد غياب طويل إنه يرجعني لحالي شوي .. وأفكر بحالي ولو مرة وحدة بس .. شكراً زين .. مش طبيعي
التعليقات (0)