لقطات مبعثرة

أبو عبدالله وهانى جمعتهما ظروف العمل فى نفس المكان عدة أشهر قليلة ولكنها جميلة ، فالأول حصل على دبلوم متوسط فى أثناء العمل ، شديد الذكاء وسريع البديهه ، كثيراً ما كان يأخذ الجريدة من هانى ويقرأها ثم يشرح لهانى وجهة نظر ذكية بعد أن يناقشه فى بعض الأخبار الغريبة فى الصحيفة ، لذلك ليس غريباً أن يستشهد هانى بوجهة نظرأبو عبدالله فى كثير من المواقف والكتابات ، وكان ثانى شخصية يستشهد برأيها بعد الأستاذ محمد حسنين هيكل (!!) ، وحزن هانى مرتين : الأولى عندما تم نقل زميله لمكان آخر وكان عزاءه أنه يراه فى الشهر مرة أو مرتين ، والثانية وهى الأصعب عندما نُقل أبو عبدالله لمحافظة أُخرى بعيدة ونائية ، ولم يعد يجمعهما إلا مكالمة فى كل مناسبة ، وصباح يوم عيد الفطر الماضى تكلما مرتان حيث إتصل هانى به فلم يرد وبعدها إتصل هو ب"هانى" وكانت تلك هى المكالمة الأولى :
جرس الموبايل ويظهر إسم أبو عبدالله الأسيوطى على شاشته
- ألو كل سنة وأنت طيب يا أبو عبدالله يا غالى
- كل سنة وأنت طيب ياعم هانى
- أخبارك إيه وأخبار الواد عبدالله والواد عبد الفضيل ؟!
- كله تمام والحمد لله
- إنت فى الشغل واللا فى أجازة ؟!
- أنا فى البيت واخد أجازة سنوية أسبوع
- أيوة ياعم ماشية معاك
- حنعمل إيه ياعم هانى قلنا نعيَّد فى البيت السنة دى
- أخبار الواد عبدالله وعبدالفضيل إيه ؟!
- والله كل شوية يدخلوا علىَّ شاريين إيشى مسدس وإيشى بندقية
- برضه عندى الواد محمد طالب بندقيه وبعدين قلت له إشترى ، فكلمنى وقالى مش لاقى فى البلد .. فاكر ياأبو عبدالله لما أول مرة يقولى كلمة فى التليفون وهو صغير وكان يوم عيد وإنت جنبى وقالى عايز بندقية (!!) فضحكت وقلت له حاضروسألتك على أنواع البندقيات عندكم فى الصعيد وقلت له حخلى عمك محمد يجيب لك واحدة كلاشنكوف !! .
- كانت أيام جميلة
- كل سنة وإنت طيب مش عاوز أطول عليك
- خد راحتك يا عم هانى همَّ خفضوا أسعار المكالمات
- أيوه الشركات بتكسر فى بعضها ...
- كله فى صالحنا .. ماهم ماصين دم قلبنا .. بس عقبال ما نلاقى حد يكسر الحديد والأسمنت
- لما يمسك عمر سليمان واللا البرادعى .. الحديد حيتكسر علطول ..
- أنا شفت فى الجزيرة صورة لجمال مبارك محطوطة على كشك كهربا ومكتوب عليها "مصر كبيرة عليك " وراسمين علامة زى علامة ممنوع التدخين .
- فعلاً مصر كبيرة بس حنعمل إيه ؟! عايزين يخربوا البلد ..
- البلد ماهى خربانة يا عم هانى
- قلتلك المكالمات بتتسجل وبلاش نتكلم فى السياسة
- ياعم هانى أنا قلت لك قبل كدة إحنا غير فعالين ، علشان كدة ممكن نتكلم براحتنا .. الفعالين أسماءهم عند الحكومة
- ها ها .. ماشى ياعم محمد مش عايز أطول عليك .. أقولك مع السلامة
- مع السلامة ...
يُتبع .....

بعد ثوانى من إنتهاء المكالمة الأولى بينهما تذكر هانى أنه لم يأخذ رأى أبو عبدالله فى مسلسل "شيخ العرب همام " بصفته صعيدى ، فكلمه من نمرة تليفون ًُأخرى :
- ألو .. السلام عليكم ورحمة الله .. الناقد الفنى الأستاذ محمد عبدالله معايا ؟!
- صمت للحظات .. ها ها .. نمرة مين دى يا عم هانى
- دى نمرة إحتياطى بكلم بيها حبايبى .. إنت تابعت تمثيلية "شيخ العرب همام " ؟!
- يعنى .. كنت بأشوفها بس مش كلها
- شفت آخر حلقة إمبارح ؟!
- لأ والله .. كنت بربِّط السمسم
- إنت زارع سمسم ؟! يعنى حتبقى مليونير قريب ..
- ها ها .. دول قيراطين مبينفعش فيهم زرع لأنهم جنب الطريق ولا مؤاخذة البهايم بتنزلهم وتاكل الزرع اللى فيهم فقالوا لى إزرعهم سمسم لإنهم مش بياكلوه
- بتزرعوا عندكم السمسم الأبيض والا البنى ؟!
- والله أنا أول مرة أزرعه وما عارفه ، وزارعهم علشان نآكل دُقة ..
- ها ها .. يعنى حتاكل دُقة بمحصول قيراطين .. دا السمسم سعره وصل 15 جنية للكيلو
- ها ها .. ماهو طول السنة حناكل دُقة بقى .. وإنت بتسأل ليه على شيخ العرب همام ؟!
- لأنى عارفك ناقد فنى للمسلسلات الصعيدية .. يعنى طريقة ربط العمة واللغة الصعيدية فيها غلطات واللا لأ
- دا قصة شيخ العرب همام قديمة قوى يا عم هانى .. والهمامية دول ناس محترمين جداً وكويسين ومؤدبين
- همَّ لسه موجودين وحالتهم حلوة ؟!
- أيوة .. ومبسوطين ومعاهم أراضى .. كانوا حاكمين البلد يا عم هانى ..
- دا أنا زعلت على اللى حصل فى آخر حلقة إمبارح .. كان ممكن شيخ العرب يغير تاريخ مصر
- وإيه تانى ؟!
- نفسى واحد صعيدى ذكى زيه يمسك البلد .. إنتو عارقين العيبة يا عم محمد
- المرشحين للرياسة كتار ياعم هانى
- ها ها .. إنت ما مضيتش على بيان البرادعى ليه ؟!
- لأ .. لأ .. مش داخل مزاجى .. عندك عمر سليمان ده فى الصف الثانى ورا رئيس البلد علطول وعارف اللى بيحصل قدامه
- على رأيك وبعدين هو كبير فى السن ويمكن تكون فترة حكمه إنتقالية لترتيب وضع البلد وتصحيح مسارها .
- وخللى بالك .. أنا ما أستبعدش إن موضوع ظهور عمر سليمان عامل زى حقنة الحساسية .. ياخدها الواحد لدقائق فقط للإختبار..
- وبعدين ؟!
- وبعدين حناخد حقنة جمال مبارك فى العضل بسرعة .. بس أصبر ياى عم هانى
- ها .. ها .. ضحك متواصل .. يخرب عقلك ياأبو عبدالله .. الأفكار والتشبيهات دى بتيجى لك فجأة والا إنت مفكر فيها قبل كدة ؟!
- والله كله تلقائى وأفكار تأتينى على الهواء مباشرة وأرسلها لك فى لحظتها عبر الأثير ..
- ها .. ها
- يالله ياعم هانى مش عاوز أطول عليك أكتر من كدة وكل سنة وانت طيب وعيالك طيبين
- مع السلامة يا عم محمد
- مع السلامة يا عم هانى