كفاية ذل

 كفاية ذل " شعر نادر الأسيوطي"

كفاية ذل دي الاهانة عار

كفاية بقي لازم ناخد بالتار

صاحب البلد خايف من النصاب

وطي راسه خايف ينضرب بالنار

قام الحرامي علي البلد وغار

وداس برجله ماهمه أي قرار

أصل الحكاية سببها  جوانا

سكتنا له قام دخل بحمار

برتع وربع ووسع  المعمار

وسع خرابه وقاللي دا استعمار

أهل البلد سابوا المرعي بسهوله

قامت الغوله ترقص علي المزمار

دقنا الذل والحلو عار بمرار

والقلب ينفخ وطالع منه شرار

ماسكين ايديّه نفسي الحبل ينحل

آكل واشبع من دم دول الأشرار

قام الجبان علي الحدود وغار

عمال يجرب لعب قط وفار

قتل شبابنا واحد ورا التاني

ماسك دماغي الدم طق وفار

يا أهل بلدي يا منبع الثوار

اصحم وفوقوا وافهمو لي حوار

اوعوا تتوهوا وسط مشاكلكم

عدوكم متربص عدوكم غدار

يا أهل بلدي يا منبع الأحرار

ياأصل الحكاية يا منبع الأسرار

ايدكم في ايدي نبني ونوحد

نبني بلدنا ونحمي حدود الدار

شعر نادر الأسيوطي