قصيدة .................... فرحة كاش

انا قلبي ماستغناش
ولا عمره منك ضاق
مع انه عمره ما داق
الفرحة منك كاش
الفرحة للبكاش
بتجيله بالقناطير
ونصيبي جه تقطير
اكمن قلبي بسيط
آه منه نفس الداء
بتموتي في التقسيط
بتقطعي الفرحة
تديها بالتنقيط
ألقى الفرح مسّخ
وبتوعدي لبكرة
والفكرة بتبوّخ
ورضيت بفرحة اقساط
أحسن ما يبقى مفيش
مع ان جوه الفيش
اسمك سوابقه كتير
في الوعد والتقصير
والوقت والتأخير
وبرغم خوفي ساعات
يا واخدة مني راقات
عرضك رفضت ارفضه
القسط جيت اقبضه
قالولي هات اثبات
طب حقي مين يضمنه
ماباخدش حقي شيكات
لو عشقي ويقيني
والصبر ف سنيني
وثباتي في الأزمات
لو كل دا ماكفاش
كضمان لحقي بلاش
فضينا م الاقساط
واديني فرحتي كاش