قصيدة قعدة عرب

قعدة عرب
ماتصلوا بينا ع النبي
وبقول عرب
يعني يقوم الاجنبي
أصل احنا أهل ف بعضنا
هانشوف همومنا لوحدنا
من غير عزول
بس احضرونا يا اهل العقول


اخوات وبعدتنا المصالح والحدود
مع إن لينا نفس الجدود
نفس الأصول
نفس الميول
بس الرايات عليت مابينا كالسدود
وصورولنا اخواتنا بره السد غول
يا إما ناس كارهانا كره بدون حدود
أو خلق عايزة تمص خيرنا زي دود
أو ناس غريبة عننا
مش أهل ولا من دمنا
فقفلنا بقى على نفسنا
ولهتنا دنيا منسيانا أصلنا
سارقانا حتى من حلمنا
عامية عيونا عن اننا
نفس الجروح بتصيب قلوبنا كلنا
نفس الآهات محبوسة غصب ف صدرنا
وان جالنا يوم علينا صوتنا بهمنا
نفس الكمامة يتسد بيها بقنا


سياسات وشايفة ان التجمع شئ خطير
أصل العرب لو ملمومين تفرق كتير
دسوا السموم وسط الملاعب والشاشات
زرعوا مابينا حروب عشان اتفه حاجات
قال ماتش بينا عشان نقابل بعضنا
ومحاولة لجل يزيد معاها قربنا
ويدسوا حد يقول شمال
فيرد حد يقول يمين
وف بحر كلمة كلمتين الماتش يقلب عكننة
وسباق طرب
يتجمعوا فيه العرب علشان يزود حبنا
جوه السبق
احضان وعشق يهزنا
بره السبق
خناقات تشوه شكلنا
تصويت عشان واحد يفوز ياخد لقب
قال واحنا يعني نكون ساندنا بعضنا
بس الحقيقة بتعلى جوانا الأنا
ماناخدش بالنا اننا
مضحوك علينا كلنا
علشان نتوه عن حقنا
وان جالنا يوم علينا صوتنا بهمنا
نفس الكمامة يتسد بيها بقنا


من كبتنا طول السنين طق الشرار
من عتمة الليل التقيل طل النهار
صوت انطلق
جلجل صداه شق السكون
لحظة تحدي
يا هانبقى فيها أو لا نكون
صحوة شعوب هزت عروش وملتها خوف
رغم الفتن رغم الدسايس في الصفوف
من غير مايدروا وحدوا فينا الأنين
صرخة غضب
ردوا العرب متجمعين
ولقينا روحنا من بعد غفلة مصحصحين
وفهمنا فجأة اننا
نفس الجروح صايبانا واجعة قلبنا
نفس الآهات بتهزجدران صمتنا
قادرين نعلي الصوت ونطلب حقنا
ولا حد يوم يقدر يكمم بقنا
جر القلم سجل ولادة فجرنا
اشطب فواصل ياما شقت أرضنا
وحد راياتنا تحت راية حلمنا
احنا العرب
مين قدنا؟
مين مجده يعلى لمجدنا
وتاريخه حافل زينا
واذا كنا فتنا دربنا
وغاب شوية اسمنا
آن الآوان
هانلم بعض وكلنا
هانعيد تاريخنا وذكرنا
فوق القمم علم وأدب
سجل هنا
في تاريخ جديد راح يتكتب
يبدأ بصحوة شعبنا
مابقاش لنا قعدة عرب
دلوقتي في
وحدة عرب

يتلم بيها شملنا