قصيدة صحصي يامّا

صحصحي يامّا قبالك
ألف خية منصوبالك
... ناس كتير متغاظة منك
ناس كتير متربصالك
خلق هايجننها انك
تصحي فجأة تشدي حيلك
أصلهم خفافيش وسرقة
عششوا في زوايا ليلك
أو كلاب نهشت في أهلك
وانتي ممنوع انفعالك
مرة واحدة لقوكي صاحية
واقفة بتلمي ف عيالك
راجعة تاني تزيني عرشك
صلبة وف قمة جلالك
يعني حاجة بجد تفرس
تحرق الدم ف عروقهم
لما يقضوا العمر ضدك
ويلاقوكي بردو فوقهم
مش محوأ فيكي كيدهم
مش مأثر في احتمالك
لأ وأكتر من ده فوقتك
قفّلت ليهم مسالك
وقفت ليهم مصالح
جرجرتهم ع المهالك
يبقى لازم يمنعوكي
إوعي ليهم خلي بالك
الطريق مش سهل يامّا
ألف خية منصوبالك