قصيدة سمع هس

اسكت بقى يابني انت وهو
علّي يا جدع الصوت دا شوية
... كأن مذيع بيقول الريس
محبوس بيحاكموه في قضية
يانا يا الراجل ده بنهيس
اقلب يابني على المصرية

مش معقول ايه ده يا اخواننا؟!!!!!!!
هاتلي النضارة الطبية
والسماعة كمان بالمرة
وانطحني ف راسي بروسية
حلم يا عالم ولا حقيقة
ولا تكونشي دي كاميرا خفية

الريس وولاده اتحبسوا؟!!!
الأسرة الحاكمة الملكية
ثبت عقلي يا ربي ف راسي
دا كتير اوي والله عليا

استوعبت الثورة تقوم
وتفضل للآخر سلمية
وان الريس يرحل صاحي
مايجيش "جيمي" من بعده رزية
وان الحاشية واحد واحد
تدخل طرة ويا الحرامية
لكن اشوف ريس يتحاكم
اهي دي بقى معجزة الهية
محض خيال شايفينه بيحصل
قوم يابني ناولني مصلية
هاسجد سجدة شكر الظاهر
بعد الرخص هايبقالي دية