قصيدة آسفين لمين؟!

لما مليون كيلو مربع
يضيقوا في عيون شاب مرعرع
ماينوبوش منهم كام متر
لا يبني فيهم بيت ولا يزرع
فيرمي نفسه في عرض البحر
عشان يهاجر لشطوط أوسع
وفجأة تغدر بيه المية
لا حسن نية ولا حلم يشفع
ويرمي عينه على شط بلده
ويعاتبها وروحه بتطلع
مضغني برك ليه ورماني
لشطوط غريبة عشان اتقطّع
دانا كنت فاقد أملي ف ضهرك
وقلت يمكن البطن تبلع
بخلتي حتى بمتر يداري
جتة مسافر كان نفسه يرجع؟!!!!!
ويطلع المسؤل يتكلم
وكلامه ينزل ع الجرح يولع
ويقول تصرفهم دا اشارة
على جهل منهم واستهتار
.
.
.
.
.
.
.
.
.
طب واللي غرقوا مع العبارة
واللي ولعوا ف قطر النار
واللي نزلت فوقهم صخرة
محت معالم أهل ودار
واللي شربوا الفشل الكلوي
واللي أكلوا السم خضار
كان جهل منهم واستهتار؟!!!

واللي دفعوا تمن كلمتهم
واندفنوا عمر ورا الاسوار
واللي حاولوا يفيدوا بلدهم
ملقوش عقول تقبل أفكار
واللي داروا العمر ف ساقية
وضاع تعبهم في المشوار
كان جهل منهم واستهتار؟!!!

وناس تقضي العمر ف عشة
وف تربة الريس معمار
وناس تعيش حافية وعريانة
وبدلته بكام ألف دولار
ونقوله هم بلدنا يا ريس
يضحك ويقلبهالنا هزار
بالذمة مش دا الاستهتار؟!!
وبرغم ده

في ميدان ومن بين الميادين
وقفوا الجماعة بتوع "آسفين"
آسفين يا ريس
داغصب عنا ومش راضيين
ارجع يا ريس
تايهين في بعدك ومحتاسيين
بنموت يا ريس
ماترش رشة م الأوكسجين

مش شئ غريب؟!!!!!!!
برغم ظلمه في ناس تستحرم
تشوفه بيكفر عن ذنبه
ونئن من قسوة أيامه
ويغنوا هم بعشقه وحبه
ونرفض انه يكمل بينا
ويقولوا بردو هانفضل جنبه
ونقول محاكمة نزيهة وعادلة
يقولوا نرفض حد يحاسبه
قال ايه تاريخه طويل ويانا
ماهو طول تاريخه دا أصل ادانته
وماكانش يعرف باللي بيحصل
هو احنا يعني اختارنا بطانته؟!!!
مش هو عينهم بمزاجه؟
ما اختارش ليه حد يصون سيرته؟
ماتابعش ليه سيرهم وسلوكهم؟
تفسرولنا ازاي بقى صمته؟
وبرغم ده
تلاقي ناس بتعارض بردو
ان احنا حتى نقول هانعاتبه
باينهم عشقوا العبودية
واستحلوا طعم الذل وغلبه
واستخسروا فينا الحرية
واستكتروا ينول شعب مطالبه

وف ايدنا ايه؟
لا حد يقدر يوم يعاتبهم
ولا حد هايقول دول أشرار
ثورتنا جاية تحرر صوتنا
فيبقى هم كمان احرار
قولوا براحتكم أي كلام
واختاروا ليكم أي شعار
بس بصراحة
لو كان ضروري تقولوا آسفين
في غيره أولى بالاعتذار