مواضيع اليوم
قصيدة: صراحة انتخابية
(صراحة انتخابية)
كلي المن انتخب عقلي يكول
و بصراحة احجي و ما عندي ميول
كلي المن انتخب حاير يناس
شلون انته بجفك ترد السيول
هذا سني يكره الشيعي و يذلة
و ذاك شيعي يكره السني بأصول
و هذا كردي قافل يريد انفصال
و ربعة فوك الجبل دكو بالطبول
و المسيحي شانه من شان البقية
و تركمان و شبك، مندائي و شكول
هذا مو لعب الدعابل و الجعاب
هذا حلم اطفال ماكلهه النحول
هذا موسوك و تزايد بالاسعار
هذا حق الوطن مايرضة ميول
عيبنة ما عدنة راي و لا فكر
عيبنة نركض و ره اللبست حجول
هذ علماني يتنومس بالوطن
زاهد بأفكاره ما يدري شيكول
هذا مثل غراب هل ضيع مشيته
ينوح مثل ام الولد: يبني دللول
ذاك حاير بين حانه و بين مانه
يملي بجرابه و ما همه اليكول
و يا سلام طالت ايام الظلام
و خيرنه مبيوك و بجفك يا غول
و كفو تارخنه و كسرو قلمنه
و حته جاهلهم يسيطر عالعقول
لا تصدك كلمن ايكلك احبك
و لا تدير الراس و تأمن هذول
عيب عل يحجي و مسح عالباب ايده
و ضعنه ما بين التحدي و الفضول
سود الله كلوب مليانه حقد
للمنايا تشوفهة مسابك خيول
هاي سبع اسنين صارت و انكضت
و احنة بين الآه و الدمعة نصول
شلون راح انعيش اخوة بهل الوطن
و احنة ما عدنه المشة براي الرسول
و اللي كالوا حنة من امة محمد
كفرو بهذ النبي و بتنته البتول
ذيابة صارو نهشو بلحم الفقير
شوفهم مثل الجلب يمشي و يبو...
فرقونه و كمنه نحجي بلا دليل
و العمايم صارت بروس العجول
و رجعت الكوفة تبايع من جديد
و ضاع دم حسين و الشيعة ذهول
صلت الوادم توضت بالرذيلة
ساكته عن الحك تشبه ابو الهول
لا تصدك حسن و تجذب حمود
رادو يخدعونه و شمسك أفول
و العجيب اليوم كلهة توحدت
كامت تزامط مثل تيس الصخول
خلي يبقى الوطن واحد مو اثنين
و خلي تحكم بينه اصحاب الحلول
خلي نبقى انعيش ما بينه ذليل
و خلي كل هذا المرض منه يزول
حقنة نكدر ننتخب اللي نريدة
حقنة ما يمنعنة شامت لو عزول
الناس طيبة و الوطن اطيب بعد
و اللي راح ايصير منريده عجول
خلي حلمك لهلك و ناسك و بس
لو تجي الواوية انكص الذيول
خلي نشرب ماي دجلتنه العذب
خلي نحمي الورد من هذا الذبول
خلي هذا الحلم يتحول حقيقة
خلي صوت امي يطوف اعله الحقول
و خل نعيد الراح من جدة و جديد
و العلم يزهي و ينور العقول
هاي بغداد الحبيبة ام الحياة
عانكت دجلة و تتحدى المغول
و ذاك مجدك يا علي شامخ يظل
و هذا حب الناس الك لا ما يزول
و المناير عانكت نخل العراق
و الجبل فرحان و يناغي السهول
و الرادي تسامر البصرة و بحرهه
و العمارة تناجي كركوك و تكول:
وطن واحد من شماله للجنوب
و رايتك يا موطني فوك التلول
انريد هذا الموطن الناسه و هله
و الغريب انكله ممنوع الدخول
ربي يحفظلي العراق و تربته
و لا تدور عل الفرع دور الأصول
علي الساعدي
بغداد: 11/شباط/2010م
أضف تعليق
آخر الأخبار من إيلاف
من صوري
فيديوهاتي
التعليقات (0)