قصتنا مع الفايسبوك-الجزء الثاني

الفايسبوك ببلاش ، ليش حتى ما تشترك فيه ليش. غسل إجريك وفوت، إن كنت دكر أو كنتي بنوت، إختاروا شي صورة من صوركن للبروفيل، من يللي عاملينلهن على الفوتوشوب تجميل.

بالأول فتش يا شاب عالحبة النضيفة، وبتزيد عندك كم بنت ظريفة . وإن كنتي بنت بنوت أو متزوجة، تقلي حالك ومن بعيد لبعيد عالشباب تفرجي ، إختاري بالأول من بنات جنسك، وانتبهي باختيارك، حتى ما شي وحدة بتحب النسوان تطلعلك يا شحارك. هيدا إذا ما كان رجال وعامل حالو مرا، على طول أعطي بالك وهلم جرا....

الوقت ما بيطوﱠل والبريد عندك بوقت قصير رح يفوﱠل . تلاتة من لبنان، من بيروت المتن وكسروان، اتنين من البحرين. وواحد من طالبان. واحد أبيضاني من السودان من أم درمان.. شي من السند وشي من الهند، وتنين من مصر واحد من مدينة نصر، وواحد من مرسى مطروح لوين ما بتاخدي بيروح. وواحد كويتي جاهز حتى يتزوجك عالسكيتي.... وزيادة عنهن شي عشرة.... من مختلف بلدان العالم المتشرة

إن كنتي حلوة قمورة، عيونك خضر وفرفورة، وشكلك متل السنيورة، لما تقري هالرسائل، رح يصير لون وجك بلون البندورة.

واحد يقلك، ما أحلاكي يا قمر، لما شفتك قلبي انفطر، رح سهرك ليلة من العمر وبدفعلك بالسترليني والدولار، هيدا رقمي أنا ناطر اتصالك على أحر من الجمر..... اي البلي تسترك ستر

والتاني يقلك، أنا من صورتك حبيتك... واندوخت عبال ما لقيتك....أنا طالع على بالي... إتعرف على صاحبة الجلالة...شو بدك بالفايسبوك ... مش خرجنا أنا وياكي ... نحنا من هالشباب المدعوك، زيديني عالماسنجر زيديني، يللا استعجلي وإيمايلك اعطيني .....اي ريتو بوزك ينسد بفلينة، متل ما بتتسكر القنينة

والتالت يقلك، أنا اعتبريني متل أخوكي... من إمك وأبوكي... شفت أنا شو كتبولك على الوول إنتبهي من الزعران ما يأذوكي...اي هيدا زلمي خرج تتعرفي عليه، هيأتو نضيف وشريف ونيتو صافية وكتير لطيف...... بتقوليلو، مرسي كتير خيي شريف، شفت كلامهن شو سخيف ، يا ديللي انا، شفت شو في شباب عقلو خفيف......

بيقوم بيقلك، شفت يا أختي يا حبيبتي يا قشطة ، في كتير شباب زعران ما بينعطوا وج يا قطة ، عم يضحكوا عليكي يا بطة، ما رح خليلك فيهن ستر مغطى، هول لما شافو عيونك يللي بتغزل غزل، وجسمك يللي بيهبل هبل، وشفافك يللي بينقطوا عسل، افتكروكي آخدي حبوب منع الحمل ودايرة تلمي مصاري بالهبل. ..... يبعتلك حمى مالطية إنت التاني، ولك رح تيجيني من وراكن جلطة

ولك شو صاير لبعض الشباب ، بيضل ريقهن عم بيشط، متل القط بشهر شباط من بسينة لبسينة بدو ينط. حسن أخلاقك يا شاب، مش هيك البنت بتنحب

ويوم عن يوم بيصير الوضع مقبول، و كل يوم رح تلاقي شي مية على اللائحة، طالبين الدخول. بتختاري الحلوين وبترفضي الباقيين وأكيد بالغلط رح يبقى يطلعك كم صقيل وكم مسطول..... إيدك والديليت وعمليلهن بلوك على طول. ورح يجيكي ورود كتير وهدايا من عطور وتياب وسوفنير، باعتلك ياهن زوزو ونوزو، كوانوزو ومنير. اعملي لكلهن رجكت، وريحي راسك بلا زهور بلا زفت وحاجي تضييع للوقت.

وأوعي تطلعي أونلاين، كأنك صفرتيلهن تصفير، هيدا كيفك وهيدا وينك وهيدا الاهبل رح يقلك أنا بشير. وإذا لا بد وظهرتي، وصبحتي كم واحد أو مسيتي، وما عدتي عالكل لحقتي، عملي حالك أنو انقطعت الكونكشن، وانكتمي ما تعودي تعملي أيا اكشن، لأنو بيتابعوكي على" الأونلاين فيد" والفيد بيفيد ... بيكشف مين أونلاين أيد بأيد .... قولولي ومنكم نستفيد.

ويمكن بعد كم شهر، بتتفتح عينك على امور كتير. بتعملي غروب بأسمك حتى يصير إسمك شهير، وبتسوقي أغانيكي ولو كان صوتك شي تعتير... أو بتنزلي أشعار لإبن المقفع على إسمك "كوبي بايست" بتحطيهن تزوير، وبتصيري تقبلي الكل كفراندز، الكبير والصغير والمقمت بالسرير، وبيصير عندك اصحاب من ميونيخ وسربرنيتشا وبوروندي وإزمير، على العمياني بتقبلي المصرصع والمنحط، المزلطة والمنطنطة واللي حاطة بدل صورتها من صور المشاهير. وبتتواصلي مع الفراندز بالقطارة وتصيري تحكيهن من روس المناخير.

وإنت يا شاب يا أمير، إن كنت من عامة الشعب، أو مرشح للنيابة أو كنت وزير، بعد ما تكون لقطت شي حبة نضيفة، اطلب صداقة شي كمشة من فراندزاتها يللي أشكالهن لطيفة، وجرب حظك، إلا ما تنقش. وحسن ألفاظك وأوعى تقلها ريتو يقبش.

قلها صباح الخير أنا بشير، بشتغل مهندس كمبيوتر وهوايتي التصوير، بتمنى نكون أصدقاء.... ونهارك سعيد وقحط ما تكون قاق، لا تلزق عليها متل البزاق، وكل ما تطلع أونلاين تنطلها باسم الصداقة والأصدقاء، خليها تتنفس شوي الصعداء، أو بتصير كل ما شافت إسمك نبق اونلاين، تنقطع عندها الكونكشن... كلامي هيدا حقيقة مش "ساينس فيكشن". بعتلا وردة كل اسبوع .... مش وردة كل يوم؟ نونونو ممنوع....وخود العبرة من اللي كتبتو فوق، خلي عندك شوية ذوق

خلص المقال .... يللا بقا... روحوا اقروا شي مقال تاني، أو بقلكن؟ روحو أقروا الجزء الأولاني

انضموا الى صفحة مشجعي وقراء غسان جوهر على الفايسبوك بالضغط هاهنا