قصتنا على الفايسبوك

شو بدي إحكيكن حتى احكيكن عن الفايسبوك، بالأول حتى تشترك رغبوك، على أساس انو بتتواصل مع قرايبينك لجهة إمك وأبوك، وتفتش عن أصدقاء الطفولة والدراسة اللي نسيوك، وتتعرف على ناس جدد، إذا عملت آد واستقبلوك، كصديق جديد بالتعارف ممكن تصيروا أصحاب إذا ناسبوك، ومن ناحية تانية بتتبادل أصناف الثقافة والعلوم ومن خبرتهم بالحياة بتزيدهن وبيزيدوك، وإذا احتجت خدمة بيقدمولك أو نصيحة بيعطوك.

طلع الموضوع مش هيك وبين مكمن العلة والتوك. في ناس مش لعلمك وفهمك بيقبلوك، كرمال لون عيونك صدقني و لجمال اللوك، كل يللي بدن اياه، انو تبوسن ويبوسوك ،وبعدين تضمهن ويضموك، وفي منهن للرزايل أحيانا بيدفشوك، شي ببلاش وفي شي عليه بالمصاري بدفعوك.

وفي مين ما بدن لا تحكيهن ولا يحكوك لا تدسهن ولا يدسوك، بدهن اياك زيادة عدد بلائحة لفرادنز يعبوك، ويتركوك هونيك وينقعوك، دعاية لالهن تاتشوف فساتينن وتسمع اغانيهن وعاصورهن بفرجوك، تا تعلق "يا جمالو" شو هالقامة شو هالهضامة نيال يللي صوروك

وفي منهن بلائحتهن بضبوك، حتى وقت الحاجة عالساحة ينزلوك ، تعا يابا نتحداهن هولي أهانوني وأهانوك، فوت شارك بهالغروب نحارب يللي عم يسبو نبينا أو يسبوا نايبنا وأبناء منطقتنا واللي جابوك ، وبيبلش رشق الصرامي وبيفلتو على بعض متل الديوك، وهوليكي الملاعين عارفين اللعبة كل همهن بالاول انو يستفزوك، ولتنمي عدد مشتركينهن بالغروب يستدرجوك ،ويوقعوك بالعصبية وتتراشقوا بالالفاظ النابية ويطق عندك شرش الحيا وعن ولاد بلدك يفرقوك،

ويللي وراء الفايسبوك عارفين شو عاملين، عندهن عن الكل داتابايز ومعلومات ويوما ما من نص بيتك إذا بدهن بيشدوك. خللي عندك على طول، حسن تقدير وحكمة حتى ما يستغلوك وبتخريب مجتمعك يغطسوك. هالموقع خلي إستعمالو للم الشمل للافادة والإستفادة مع التسلية مش حتى من تيابك يطلعوك، أو حتى تسب وتشتم ويرجع غيرك بدورهن فايسبوك

انضموا الى صفحة مشجعي وقراء غسان جوهر على الفايسبوك بالضغط هاهنا