قدام الأجانب بنكون ملائكة..!

بعد تجربة كبيرة مع الأجانب وعلاقتي المتينة فيهم، لاحظت الفروق الكبيرة بيننا وبينهم في الحياة، ومن هادي الفروق مثلا::
لما بياكلوا بياخذو راحتهم يعني ممكن يستمر تناولهم للأكل لمدة ساعة أو أكثر، وبيعتبروا إنه الأكل لازم ياخذ وقته مثله مثل وقت العمل ومثل وقت ممارسة الرياضة، لأنه المعدة بدها رحمة وحتى يدخل الأكل شوية شوية إلها..! لكن بالنسبة إلنا أول ما بتحط راسك بصحن الطبيخ بيقلك أبوك، كل يابا كل مهوا أكل الرجال على قد فعالها يعني بسرعة يا حج غمس والحق ولا ما تلحق.. وبالنسبة لـ كل مما يليك يبعت الله..!
بخصوص الشغل، ما فيه عندهم إنه يتصلو على صحابهم ويلا تعالوا اقعدوا اشربوا شاي عنا بالشغل..! وتعالوا إبقوا طشو عنا على الشغل بندردش شوية..! اما إحنا ممكن تلاقي صاحبك نطلك على المكتب بدون سابق إنذار.. ويا ريته جاي يشتغل ولا يفكر يساعدك.. لا أبدا.. بتلاقيه جاي يشرب قهوة ويروح.. ولو ما فيه عندك قهوة بالمكتب يمكن يعملك مشكلة ويزعل منك..!
بالنسبة للإحراج.. إحنا كثير بنخجل قدام الأجانب وبنكون مثاليين، يعني بدنا نبين إنه إحنا مثلهم بنحترم المواعيد مثلا، ولو أجنبي قال لواحد فيما تعال بكرة الساعة 3 بتلاقيه بينطر من الساعة 12، أما لو واحد عربي قلك تعال.. يمكن يموت أبوه وأمه ويعتذر عن الموعد..!
وآخر شغلة صارت قدامي، كنت متفق مع وحدة اجنبية نروح نقابل مسؤول، ولما وصلتها لقيتها قاعدة مع واحد صحفي أجنبي مثلها.. فلما وصلت صار يقلي كيف حالك وشو أخبارك وفيه اكم شغلة بدنا نعملها ومن هالحكي..! فراحت الأجنبية نطتله وقالتله لو سمحت عنا موعد وبعدين بتحكي لانه مش فاضيين إحنا مشغولين..! راح قلها أوووه أنا اسف جدا.. آسف آسف وما كان قصدي..! طيب تخيله لو وحدة عربية قالت لواحد لو سمحت إحنا مش فاضيين..! يمكن يروح يحذفها من الفيس بوك ويفضحها بكل غزة.. وبالآخر يطلعها بنت بتستحيش ووو إلخ

بالنسبة إلى صرت أحلق إلهم على الناشف، لانه أخلاقنا عالية أكثر منهم وبنفهم أكثر منهم ولكن فيه فئة عنا بالمجتمع بدها قطع رقاب..!

بالنسبة لبكرة شوو..!