في يوم المعلم كتبت

 في يوم المعلم

بسم الله الرحمن الرحيم

الحمد لله العفوّ الغفور , والصلاة والسلام على معلم الخير للبشرية , مخرج الناس من الظلمات إلى النور . اللهم أعد البسمة إلى شفاه المعلمين , وأدخل في قلوبهم الطمأنينة والبهجة والسرور .

أمّ بتقول لإبنها اللي خلص توجيهي : يمّا برضاي عليك يا بنيّي , بدّي أشوفك معلّم ولابس بدلة رسمية , وبيدك شنتة وبرقبتك جرافة مكويّة ,يمّا بتروح نظيف وبتيجي نظيف , وشغلتكم لا بالشّرد ولا بالبرد, وشغلتكم مثل الحراث راس مالها ظهرية .

يمّا إسمع تا أقولك . انت ابني وانا امك , وما بدي غير مصلحتك , بلاش أزعل منك وأقول يا ريتني ما خلفتك .

الولد برد على إمه وبيقول : يا ست الحبايب زمن أوّل حوّل ,وكل شي بهالزّمن تغيّر وتبدّل , يمّا المعلم اليوم حالته بالغلبة وحالته بالويل , وشغلته بهالأيّام بتقصّر العمر وبتهدّ الحيل , وتا يحصل على لقمة طريّة بلزمه يتجوّز وحدة بيّاظة أو يعطي دروس خصوصيّة , بلزمه يباطح ويناطح ويسابق الخيل , والمال اللي بجمعه نقطة نقطة بجري مثل السّيل , والكل بنهش بلحمه , والكل حاطط حطاطه , ومش سلمان من القال والقيل , وما أكثر اللي بفصّلولوا وبطرزوله وبيقولولوا إلبس غصبن عنّك وإذا مش معجبك بكل بساطة ....... استقيل . ويا عيني عالأوامر لما بتيجي من ناس فاضية ومتفضية , وقاعدة ورا المكاتب ...بتصبّ القهوة وبتزيد عليها الهيل .

يمّا المعلّم فش معه وقت يشربلو كاسة شاي ولاّ يوكلّوا سندويشة , وغيروا حاطط إجر فوق إجر وما ببتطفي سيجارته وما بتنزل من ثمّه الشّيشة . يمّا انت بتقولي انه شغلة المعلم ظهريّة , بس شغله بروّحوا معه عالدّار , والدّنيا بشتي عليه أوراق ومن كثر الأوراق صار عنده ألف دوسيّة ودوسيّة .

يمّا هذا الجيل صايع .. وحقّ المعلّم ضايع .. أنا بدّي أدرس حقوق , حتّى أصير قاضي وأطبّق حقوق الإنسان , وأرجّع لكل صاحب حقّ حقّه ,,, وخصوصا المعلّم الغلبان ,,, وخصوصا المعلم الغلبان .