في بلاد الموبذان !

يا مسافـر فـي بـلاد الموبـذان
              وش تبي منك البلاد ووش تبـي؟
شعر والا ملـك والا صولجـان؟
            وحـده تكفـي وثنتيـن تهــــبـي!
ركبت الدنيا معك ظهر الحصـان
           وانت ما تدري ولا قلت اركبـي!
أنت انا والا انـا وانتـه خـوان
            امنـا حـــــــــوا وابـوك أدم ابـي !
أختلفنا فا الزمـان وفـا المكـان
           واتفقنـا فــــي طلبـــك ومطلبـي!
خذ يدي في يدك ما فـات الاوان
              انت متنبي وانا ابحث عن نبـي !
ما عطتك الشمس في وادي بـوان
              غير دينارين من بعـض ذهبـي!
يا غريب الوجه واليـد واللسـان
              منك انا اغرب في بلادي وعربي!
يعربـي الفكـر مختلـف البيـان
                   بس مـا كنـي لســـانـي يعربـي!
في بـلاد الخـوف ادور للامـان
                   وفي بلاد الامن أخاف من الظبي !
شاعري ما دام ما ضاع االرهـان
               بيـن منكبـك العظيـم ومنــــكبـي
اخذها حكمة ولو تبغـى الضمـان
                دقني؟ اعطيت لك دقني وشنبـي !
لـو تغابينـا تسيدنـا الـزمـان
               ما تسيد فوقنـا الوقـــــــت الغبـي !