فيكي يا غالية شوية حرامية ، وعلينا عاملين جمعية

فيكي يا غالية شوية حرامية

علي الشعب عاملة جمعية

مرة تقبضها المالية

ومرةالشئون الأجتماعية

مين راح يقبض المرة دية

ومين هايلم المرة الجاية

واحنا مالناش في العملية

ولا دي جمعية للحرامية

والشعب مالهوش دية

طب خلي مرة عليك ومرة عليا

عيني عليك يا اسمر يا جدع

عمال من كل واحد تتلدع

وكاتم في نفسك الوجع

ومش فاضل غير ضرب الودع

اراضي وبيعوك

ومصانع ونهبوك

ومن حقك حرموك

وبالفقر شبعوك

ومن الخير جوعوك

وملوا كروشهم في البنوك

طبعا ما هم الملوك

وانت حيالله صعلوك

وعارفين فين يوجعوك

وبكره يموتوك

من غير ما يدفنوك

عرفت الدور علي مين المرة ديه

الدور علي الشعب اللي بقي تقلية

بيتخرط ويتقلب في حلة ملوخية

من كبير لصغير وحتي الولية

قولوا معايا تحيا الديموقراطية

مولد وصاحبه نايم في العسلية

تسقط الملوخية

ويعيش الفول والطعمية

وشلة الحرامية