فرد حمام

فرد حمام
فين وليفك .. ؟
يا فرد الحمام
وأزاى بدونه ..
قادر تنام
وبدونه الدنيا لونها ايه . . ؟
جفا ولا سلام
جاوبنى يا فرد الحمام
هو ليه مات الغرام ؟
والليالى و الحكاوى ..
والصعاب اللى هانت
والهيام
و ازاى مات الغنا ..؟
ودابت وعوده
وف عش تانى نام
جاوبنى يا فرد الحمام
فين حمامتى وسط الحمام ..؟
ف أى عش م العشوش ؟
لابسة اى وش م الوشوش ..؟
جاوبنى يا فرد الحمام
هو ممكن الحمام ..؟
فجأة يبقى م الوحوش
جاوبنى يا فرد الحمام
فين حمامتى وسط الحمام ..؟
وازاى بدونها ح اقدر انام ؟
حمامتى كانت مش زى الحمام
حمامتى قصيدة ..
حمامتى مانجة وبرتقان
كانت شتوية دافية
ونسمة ربيع مليانة حنان
كانت و كانت ..
وكان اللى كان
غيرتها الليالى ..
قساها الزمان
واختارت عشه م العشوش
و اختارت وش م الوشوش
وش ف الحقيقة معرفوش
لا فضلت حمامة
ولا بقيت م الوحوش
جاوبنى يا فرد الحمام
ليه رضينا نكون حمام .. ؟
نرمز دايما للسلام
نكتب ف الحب احلى الكلام ..
ونخبى جوانا ..
طعم الالام
اسمعنى يا فرد الحمام ..
واقبل استقالتى من دنيا الغرام
منتصر سلطان محمد
اسوان – السيل الريفى
monty_sol@yahoo.com