ـ مـوروثـات أغـانـي الـسَّـفَـر والحـنـيـن ـ القسم الثاني

وأما أغاني الدلعونا فقد وظفت كذلك للتشكي من البعد واللوعة للوطن ومن فيه ومنها

 * ... على دلعونا وعلى دلعونا      يا احباب القلب راحوا اوخلّونا

ــ ...   بحبك يا ولفي من السفر لافي   ميل عليّ او قل لي عوافي

        وياما حكينا تحت الصفصافي    ونسم يا هوا الغربي حنونا

ــ ...   يا اللي سافرتوا أول عامٍ أوّل     يللي هَواكُم في القلب حَوَّل

        تحرم عليّ الدَّبكه بالأول          طول ماإنتَ غايِبْ يا ابو العيونا

ــ ...  لطلع عالجبل واندا يا اصحابي   اللي سافروا اوطال الغيابي

        حنوا عليَّ رَوَّح شَبابي         خايف ما القاكم ولا تلقونا

ــ ...  شباب البلد سافر عالغربه       خَلّوا العجايز يحفظهم ربي

       عودوا يا احبابي تعوا لعندي    أنا ابغربتكم دايم محزونا

ــ ...  سافر حبيبي ببابور السكِّه      قلبي ودَّعهم والعين ابتبكي 

        تحرَم عليّ النزله عالدبكي     طول ما إنت غايب يا أسمر اللّونا

ــ ...  سافر حبيبي وأبعد المنزل      يا دمع عيني حالف ما ينزل

       يا طيرٍ طاير إن كنت ابتحمل  تحمل أشواقي للي ايحبونا

ــ ... في أرض بلادي لأبذر وافلح   وعمِّر ارضي وازرع واصلَّح

      خييّ يا امسافر عابلادك روّح     يا مثل بلادك ما في بِالكونا

ــ ... وقِّف تا قول لك وقف تا قول لك  رايح عالغربه بلادك أحسنلك

       خايف حبيبي اتروح وتتملح      وتنسى حبيبك هونا محزونا

ــ ... سافر عالمغرب سافر عالمغرب  ريت اللي لامونا عالفرقه ايجرب

          مِتا دلعونا مني بتقرب         عيد المحبه يوم ايلاقونا

ومن الدلعونا إلى الجفرا ..........

*....  جفرا ويا هالربع     تمشي بفي البستان

        ومن شوقها للبلد     ولقَعْدِةْ الخِلاّن

        ما جَفَّت ادموعها    تمشي مثل العميان

        يا احبابنا عاودوا    وارجعوا عالأوطان

        حب الوطن عندنا    اعبادي مش غيا 

*.... جفرا ويا هالربع       تمشي بسهل برقه

       والموت عندي يا ناس   أسهل من الفرقه

       يا غايبين ارجعوا         إشتقنا للملقه

       نقعد مثل ما كنا           بالهوا والفيا

* ... جفرا ويا هالربع       وابتخبز عالصاجي

       مدقوق عاصديرها    خرفان وانعاجي

       يا للي هويت البنت     البنت غناجي

       إن قَرَّبِت منِّها          اتروح ابشربة ميا

*... جفرا ويا هالربع        يا لابسه الخرقه                

      والموت عندي يا ناس أسهل من الفرقه

      يا خالق يا معتلي        يا أبو خيمه زرقا

      ترد الولف عالولف     بساعه رحمانيه

ومن ألأغاني الشعبية الدارجة والمعروفة في ريفنا الفلسطيني أغاني ( يا زريف الطول ) وتغنى في كل المناسبات ومنها :ـ

* ... يا زريف الطول وقِّف تاقول لك   رايح عالغربه بلادك احسن لك

       خايف يا محبوب اتروح وتتملَّك   وتوالف الغير وتنساني أنا

* ... يا زريف الطول بالكبكه يصيح    والعطر والمسك من ثيابه يفيح

       إن كنت ناوي عالسفر قول الصحيح  ايدي بإيدك والرزق عاربنا

* ... يا زريف الطول يا بو سنٍّ ضحوك   ياللي رابي في دلال إمك وأبوك

       يا هم إقليبي لما سَفَّروك                شعر راسي شاب والظهر انحنا

* ... يا زريف الطول قاعد عالعراق       والوجه إمنوِّر سبحان الخلاّق

       ريتك ما هلّيت يا شهر الفراق         فَرَّقت بين الحبيب اوبيننا

* ... يا زريف الطول قاعِد عالرْجوم      لابس الروزا ما ايطيق الهدوم

       بعد ما كانت المحبه دايم دوم          يا حسرتي صار الورق مرسالنا

* ... يا زريف الطول قاعد بالسّاحَه        من كير الغِوا بِلْعَب ابتفاحا

       بعد ما كانت المحبِّه امصافحه         يا حسرتي صار البُعُد عِنواننا

* ... شو كوى قلبي بهواكم شو كوى       يا أبو شعورٍ على الكتاف امْنَثْوَرا

       شو اللي سويته شو إللي عملته أنا    شو اللي سوته حتى ايجافونا احبابنا

* ... يا زريف الطول سافر عاشمال       بِحصُد القمح وبِلِمْ اشمال اشمال

       والله يا ولفي اوتبقى على البال        تا يخلُص الصيف وتِرْجَعْ عِنْدِنا

* ... يا زريف الطول مالي ومالكم         ابتليتو بالسفر ياترى إيش حالكم

       يا تَرى يا زريف نيجي ببالكم         مثل يا زريف ما ابتيجوا ببالنا

* ... يا زريف الطول على عين العلق     والعنق طويل هيك الله خلق

       بسمات اشْفافِك اتشابِه للطَّلَق          يا إم السبع دقات تحت المبسما

* ... يا زريف الطول نازل عالعيون      والصدر بستان وامشجَّر ليمون

       طلبت البوسه قالت ما بمون          اصبر بالحلال إحنا لبعضنا

* ... يا زّريف الطول وين أهلك غدوا    عاسهل حوران راحوا وأبعدوا

       وليش الحبايب يا ربي أبعدوا         خلّوني بِالهَمْ وَحْداني

                                  **************

ومن  ألأغاني الشعبية المحلية أغاني عاليادي اليادي .... ومنها :ـ

* ـ عاليادي اليادي اليادي يا ام العباديا   يااحباب لا ترحلوا ظلّوا حَواليا

     لا تِرحلو يا خلق عيشتنا هنِيِّه         بنعيش ببلادنا عالهوا والميا

     لا يرحلوا يا احبابي عيشتنا هنيه     غيابكم عَنِّنا راح يقضي عَلَيّا

* ـ عاليادي اليادي اليادي سافر عالبحريني  من يوم ما رحلتوا ما نِشفت لي عيني        

     سهران عد النجم ليله ورى ليله        بلكي طلوع الشمس ايرد الولف لِيّا

* ـ ولعت نار ابقلبي تكويلي الفوآدِ         انا ما بدي الغربه بدّي أرجع عابلادي

                 اوكل من خبز الطابون وأزرع أرض اجدادي

                     ما بدي درهم خليج ولا ريال سعودي

                 ابتسوى كل الدولارات طلعت شمس بلادي

                     ازور كرم العنب وأشرب حفنة ميّا

وأيضا أغاني الياني الياني ومنها :ـ

*...  علياني اليني الياني     علّي راح وخلاّني

        لسهر الليل ابطوله      لوَّع قلبي ورماني

        يَما ما بدي الكويت      ابتبعدني عن خلاّني

        راح وخلاّني بهمي      انا إللي خصري ظَمِّه

      وإن ما جاني عصريه       لمزع هالفستانِ

      راح وخلاّني صبيه          ما شقتني الذريه

      مش حرام يا بريه           أنام أنا وحداني

وكذلك أغاني اسكابا وهي قليلة ولم تعد معروفة تقريبا ومنها :ـ

      اسكابا يا دموع العين اسكابا     تعي وحدك لا اتجيبي حدا با

      وان جيتي وجبتي حدا معاكِ     لهد الدار واجعلها خرابا

      شفت الزين عالبلكون واقف      رمش عينه كحد السيف واقف

      وأنا نويت اني ظل حالف         على العهد تا نكتب لِكتابا

      سكابا يا دموع العين سكايب      قلبي حيران عافراق الحبايب

      حبك عاروحي وعلى القلب واجب  ليوم الموت يا أعز الحبابا

      سكابا يا دموع العين هيلي        قلبي ولهان بهوى الطويلي

       لبكي بدموع ما تنكال ابكيلي    على لفراق ووداع الصحابا