عن المدونة

وانت مالك سيب الملك للمالك

هو انت هتغير الكون

وانت هتقدر تعمل ايه

سيبها على ربك

يعني ايه شوية زبالة مرمية في الشارع مش هيأثروا في حاجة

يعني سواق يغلي اجرة ربع جنيه هو الربع جنيه هيعمل ايه يا ما ارباع

يعني ايه دكتور ميروحش المشتشفى ما المستشفى مليانة دكاترة هيأثر بأيه غياب دكتور

يعني ايه مريض يدخل ويترمى بالمستشفى من غير محد يسأل عنه في كتير منه موجودين مش هيأثر لو مات حتى الدنيا مليانة

يعني ايه موظف ميقومش بعمله الا لما يأخد رشوة يا عم الخمسة جنيه الي هتدفعها دي مش هتفقرك

يعني ايه بنت لابسة من غير هدوم وبتزعل من شاب يعاكسها او يتحرش بيها

يعني ايه بنت محترمة في الشارع ويجي شاب يهينها أو يضايقها أو يتحرش بيها

يعني ايه ويعني ايه ويعني ايه

علشان كل ده انا مش هسكت

مش هسكت على طريق مكسر

مش هسكت على عربية زبالة يركب فيها بني آدمين وهي متنفعش الا لنقل للحيوانات الله يعزكم

مش هسكت على مستشفى مش بتحترم المرض وتعاملهم زي بقية البشر

مش هسكت على زبالة مرمية بالشارع

مش هسكت على موظف بيمد ايده أو مش بيشوف شغله أو بيعطل مصالح الناس

مش هسكت على مسئول همة الأول منصبه ومصلحة الناس تحت رجلية

مش هسكت على وزير أو رئيس وزرا أو غفير او حتى رئيس يعمل الخطا او يسكت على الخطأ أو ميحسبش الي بيعمل الخطأ

مش هسكت على حقوقي لو اتنهبت مني

مش هسكت على جرايد بتزور الحقيقة للناس

مش هسكت على مذيعين عايزين يلمعو نفسهم على حساب البلد

مش هسكت لسبب بسيط قوي اني خلالالاص زهقت من السكوت

مش هسكت لسبب بسيط اني عايز بلدي دولة عظمى

وانت كمان متسكتش ابدا وخلي الصفحة دي لنشر اي مخالفات بالصوت والصورة والفيديو والكلمة علشان بلدنا ترجع تاني

ام الدنيا بجد

مدونة على جوجل http://meshhaskot.blogspot.com/

مدونة على ايلاف http://www.elaphblog.com/meshhaskot

مدونة على احلى http://meshhaskot.ahlablog.com