عمى سيد عجايب زعلان من مباراة مصر والجزائر

بينما كنت أسير فى إحدى حارات القرية رأيت عمى سيد عجايب جالساً يضرب كفاُ بكف ويغمره حزن شديد فاقتربت منه كعادتى معه وسلمت عليه وسألته :

- ما الذى يحزنك يا عم سيد ؟
- يعنى مش عارف ؟ أكيد عارف
- صدقنى لا أعرف سبب حزنك
- ألم تسمع عن العالم الفاضية بتوع لعبة الكورة ؟
- طبعاً أسمع فماذا حدث منهم؟
- يا صديقى هو انت فى كوكب تانى ، يعنى معرفتش المصيبة اللى حصلت فى السودان بعد ماتش الكورة بين منتخب مصر ومنتخب الجزاير علشان يوصلوا لكاس العالم .
- طبعاً سمعت ومن ساعتها قرفان من اللى حصل
- شفت الناس الفاضية دى ؟ علشان كورة ولعبة كانت حتحصل مجازر وأهى مصر والجزائر حصل بينهم خلافات وصلت لحد استدعاء السفراء علشان شوية متعصبين من هنا وشوية من هناك .
- تفتكر كان ايه الحل فى رأيك يا عم سيد
- مصر والجزائر حكومات وشعوب يعلمون علم اليقين أن هناك تشنج كروى تاريخى بين البلدين وأن هذه المباراة الخطيرة والحاسمة والتى ستؤهل إحدى الدولتين لكأس العالم كان يجب أن تتم بتكتيك خاص .
- مثل ماذا؟
- مفيش مانع تتلعب فى السودان الشقيق ولكن بشرط عدم حضور جمهور من مصر ولا من الجزائر ، يحضرها إداريو كل منتخب وبعض كبار الشخصيات لو لزم الأمر ، وبهذا نتجنب إحتكاك الجماهير والمشاكل التى كادت تقضى على الأخضر واليابس بين البلدين الشقيقين .
- لكن الجماهير فى الدولتين كانت سترفض هذا الإقتراح يا عم سيد ومن المحتمل قيامهم بمظاهرات وأعمال شغب .
- يا صديقى زى ما بيسكتوا أى مظاهرة بالأمن المركزى والشرطة يسكتوا هؤلاء أيضاً ونتجنب فتنة خطيرة العواقب سيئة الإحتمالات قد تفسد علاقة شعبين حبيبن جمعهما نضال عظيم على مر العصور السابقة .
- وهل يرضيك ما حدث للجمهور المصرى على يد جمهور الجزائر فى السودان ؟
- بالطبع لا يرضينى ولكننى أحمل المسئولية للكبار الذين وافقوا على سفر هذه الجموع الغفيرة من كلتا الدولتين ، أما أعمال البلطجة التى حدثت ضد بعض الجماهير المصرية فهى لا تعبر عن شعب الجزائر العريق ولا تمثل صورة حقيقية له ، وكل بلد فيها الحلو والسىء ، ولا انت مش معايا يا عزيزى ؟
- لا معاك طبعاً ومصدقك ومؤيدك .قل لى يا عم سيد انت بتشجع أى فريق كروى ؟ يعنى أهلاوى ولا زملكاوى ؟
- أنا ههههههههه أنا مش فاضى للكورة يا دكتور والكلام ده ، أنا كل أملى أوفر أكل عيالى وكسوتهم وعلاجهم وربنا يسترها ويكفينا شر الأمراض ، انا يا سيدى بشجع رغيف العيش النضيف الخالى من الرمل والمسامير والزلط وبشجع أنبوبة البوتاجاز اللى تكفينى شهر مش عشرة ايام وبشجع القماشة اللى تمنها على قد فلوسى أكسى بها نفسى وعيالى ومراتى ، وبشجع الصحافة الحرة اللى بتنقل الحقيقة من غير تزييف ولا تحيز لفلان على حساب علان ، وبشجع الموظف أبو يد نظيفة اللى يرفض الرشوة ويعيش على الحلال ، وبشجع المشاريع اللى تخدم بلدى وتوظف شبابها وتقضى على البطالة ، وبشجع كل مواطن شريف يبلغ عن لص حرامى بينهب مال البلد ، وبشجع كل ضابط شرطة فاهم شغله ولا يستعمل القسوة والتعذيب ضد المتهمين علشان يوصل للحقيقة فيضطر المتهم يقول اللى هو عاوزه حتى لو كان برىء ، و .... و...
- بس بس يا عم سيد هى حنفية واتفتحت ، ايه محوش ده كله جواك ؟ يا رجل فضفض بلا هم ...تصدق أنا نسيت حكاية المباراة من كثرة المشاكل والهموم اللى قلبتها علىّ ، روح يا شيخ منك لله
- انت زعلت ولا ايه يا صديقى ؟ قل بالله عليك نشجع الكورة والكلام الفارغ ولا نشجع مستقبل بلدنا فى عيشة نظيفة وعدل وكرامة وحق وسلام ؟؟
- طبعاً زى ما انت قلت وأنا موافقك يا عم سيد ..بس مافيش مانع نفرج على نفسنا بماتش كورة والذى منه .
- أنا معاك لما يكون فيها تفريج على النفس لكن هل ما حدث بين جمهور مصر وجمهور الجزائر كان فرج أم هرج ومرج وبلاوى زرقة وناس كانت حتموت وعلاقات بين دول كانت حتتقطع وناس تنطرد من هناك وناس تنطرد من هنا ، يعنى خراب بيوت مستعجل بعيد عنك هو ما فيش فهم يا عالم أما عجايب والله العظيم .
وكالعادة ودعت عمى سيد عجايب وأنا أعيد كلامه فى عقلى مرات ومرات لعلى أستوعب فلسفة هذا الفلاح المصرى العبقرى الذى لديه عقل يزن عشرات العقول من أصحاب المليارات الذين كونوا ثرواتهم من كل فيلم أغنية ولا تهمهم سوى مصلحتهم الخاصة حتى لو جاع الآخرون أو ماتوا .