علبة الهندسة

فجر والليل توه في فم النور غاب
دقت الساعه وصحيت لها الانسه
طفلة توها تقطف سنين الشباب
تقطف العام فل وتغرسه نرجسه
ما لمس جسمها الا انعم وارق الثياب
ينسج خيوطها الاستبرق وسندسه
تحته من الثمر ما لذ طعمه وطاب
تستفزه خيوط الثوب لو تلمسه
غادة في شفاها سكر التوت ذاب
لونه احمر وارق من الكرز ملمسه
دون بستانها الفتان حارس وباب
احسد الباب والا عين من يحرسه
اشترت شنطة ودفتر ودب وكتاب
واربع اقلام حبر وعلبة الهندسه
ونقشت فوق وجه كفوفها با الخضاب
صورة الموناليزا وعينها الناعسه
واستعدت بعد ما حان وقت الذهاب
تطوي الشارع بخطوة الى المدرسه
عانق الغيم وجنتها وضم الحجاب
والطريق يعدي معها وضاع نفسه
من يلوم الطريق ومن يلوم السحاب
لو غدى بينهم في عشقها منافسه
ودخلت فصلها ما تدري ان العقاب
ينتظرها على باكورة الانسه
والسبب ماهو التأخير والا الغياب
السبب صورتي في علبة الهندسه !!