صداقات المصالح

ياترى ممكن تصاحب حد علشان مصلحه معينه انت عايزها منه واول ماتوصلها تسيبه وتنساه ولا كأنك كنت تعرفه قبل كدا؟!

المصلحه الشخصيه ممكن تكون هيا اولويات شخص معين لدرجه انه مش بياخد أى قرار فى حياته غير لما يكون بيحقق ليه منفعه معينه بغض النظر عن الآخرين ومصالحهم حتى الناس اللى بيتعرف عليهم بيفكر الاول هياخد منهم ايه ومش مهم عنده هو هيدى ايه وطبعا لو مش هياخد منهم حاجه تلاقيه فى ثوانى ومن غير تردد بيبعد عنهم ومش بيضيع دقيقه من وقته معاهم علشان كدا بتلاقى الشخص دا مش عنده اصدقاء دائمين انما هو فى حاله تغيير دائم لمن يعرفهم وفقا لمصالحه الحاليه ومشكله الانسان دا انه مش بيعلن عن مصالحه دى بشكل واضح انما هو بيخدع الناس وبيحسسهم انه صديق ليهم لغايه مايوصل لهدفه وهو مش بيبقا عارف ولا حاسس بمعنى الصداقه الحقيقى ولا اهميه الصديق فى حياة الانسان اللى بيظهر فى وقت الشده بس وهييجى فى يوم من الايام مش هيلاقى حد واقف جنبه ودا ببساطه لان الحياه عنده عباره عن مصالح شخصيه وبس.

أكيد كل واحد فينا عنده مصالح عايز يوصلها بس مش معنى كدا انه كل مايبقا عنده مصلحه يصاحب حد علشان يوصلها انما ممكن يطلبها فى شكل خدمات مش يعمل صداقات علشان مصالحه.ولازم يكون عندنا اصدقاء بجد بكل ماتحمله الكلمه من معنى والمصالح الشخصيه مش لازم تكون هيا كل حاجه فى حياتنا.

وكما أخبرنا الرسول صلى الله عليه وسلم:ان هناك سبعه يظلهم الله فى ظله يوم لا ظل الا ظله ومن ضمنهما (رجلان تحابا فى الله اجتمعا عليه وتفرقا عليه.هيا دى الصداقه الحقيقيه انها تكون خالصه لوجه الله تعالى.