شيزوفرينيا

الحاله دي موجوده عند كل إنسان مش شرط يكون مريض نفسى بالرغم من إننا كلنا مرضى نفسيين ، كل واحد جواه شخصيتين ولو ربنا كارمه شويه يبقوا اكتر من كده ، أنا مثلا كنت باستعجب من نفسى لما بتعامل فى الشغل بالشدة والشخصية القوية وبالحدة فى بعض الأوقات بس من غير اهانه لحد وفى البيت شخصيه ممكن نعتبرها ضعيفه جدا قدام كلمة آه من المدام كنت عايش ساعتها فى وهم اسمه الحب ، مش المقصود من كده إن مفيش شئ اسمه الحب ، الحب موجود بس المهم انه يكون متبادل بين الطرفين مش واحد بيحب والتانى بياخد وبس ، على العموم أنا كنت عارف إنها مش بتحبنى لأنها اتجوزتنى بضغط من أهلها فكنت باحاول اعمل اى حاجه عشان تحبنى وقلت بمرور الوقت هيحصل وفى سبيل ده اتنازلت عن حاجات كتير أصبحت بعد كده حق مكتسب ليها وأصبحت بتعيبها عليا وتتهمنى بالضعف وكمان اتنازلت عن حاجات مينفعش أتنازل عنها ، على العموم أنا مكنتش شايف ده كله ساعتها لأنى كنت عايش فى كدبه كبيره مفقتش منها إلا بعد خراب مالطه وكانت بتلعب بيا زى الماريونيت وأنا فى قمة السعاده لحد مخسرت الناس اللى بحبهم اهلى واتعلقت بيها وبأهلها اللى فى أول مشكلة انقلبوا عليا والوحيدين اللى وقفوا جنبى همه اهلى ، على كل خدت كل اللى هيه عايزاه ولحد دلوقتى مش عارف هيه كانت مخططه لكل ده ولا أنا اللى عبيط .

نكمل بعدين .................

الزوج السابق