شغلتى بياع سريح

1
شغلتى بياع سريح
وسابتنى الثورة جريح
أول ماقامت الثوره
قتلتنى طريح
وأول ماجنت
جنت على البياع السريح
يا ثورجيه!
ياثورجيه
إسموعنى، حسونى
أنا عمرى ماحلمت بتغيير دستور
أنا كان حلمى جلبية كستور
أستر بيها توبى
اللى أتهرى من الترقيع
عمر حلمى ماعدى السور
2
صرخوا فيا الثوار
وقالو لى أفهم يا حمار
الثوردة ديه علشان أولادك
وعلشان تشوف النهار
قلت طيب لما نشوف!
وبعد الثوره
مت ياناس من الخوف
لا لاقى أكل
ولا حتى الحكومة
ساعدتنى بمظروف
وقلت ملعونة يا ثوره
وملعونة يا أحزاب
أنا كان مالى
قعدتوا تقولوا حريه
عدالة إجتماعيه
وبعد الثورة
ماشفتش غير بلطجيه
ولا شوفت عداله

ولا حتى حريه
3
ياناس أنا مالى بمجلس شعب
ولا مجلس شورى
أنا كنت راضى ببياع سريح
بقيت بفعل الثوره
عاطل بدون تصريح
وبأصرخ فى الميدان
وبيهتفوا الثوار
دستور أولا يا جدعان
وقلت يا ظلمه
أنا كان حلمى
جلبية كستور
رحتوا قطعتوا عليا
الماية والنور
ولا حصلت شهيد
ولا حصلت أتسجن
مع عز بياع الحديد
ضحكتوا عليا
يا ثورجيه
وقلتوا عليا حمار
طيب ياريت أكون حمار
بس أفضل بياع سريح
أسدد فاتورتى
وأطاطى للريح
بدل ما أنا جريح
مش شايف
غير إعتصامات الميدان
طيب ما أنا بأصرخ
وأقول جعان وبردان
ياثورجيه
ياللى سكنتوا الميدان
جاوبونى!
4
أرحمونى يا ثورجيه
وسيبولى الميدان
عايز أرجع أحس بالأمان
وأجرى على لقمة عيشى
يا جماعة أنا مش ثورجى
أنا بياع سريح
ياريت تسبونى لشغلتى
بياع سريح حمار
أحسن من بلطجى
أو ثورجى
مايحسش بالغلبان
  أوعاطل بدون تصريح
يا رئيس الوزرا!
يا ثورجيه!
يا أصحاب الأحزاب!
ياخلق أسموعنى
رجعونى، بدلونى
من عاطل بعد الثوره
لبياع سريح
عايز أرجع بياع سريح
طلبى واضح يا ناس وصريح
عايز أرجع بياع سريح

ملحوظة: هذه الخاطرة لا تعبر عن رأى الشخصى، ورغم إختلافى فى الرأى، كان لابد أن أقوم بتوصيل صرخة هذا البياع السريح بقلمى ورأجو أن أكون أجَدت  فى التعبير عنه بقدر استطاعتى، سواء أتفقت معه أو اختلفت، لذلك الرجاء الإهتمام برجوع الحقوق لأصحابها، حتى لا تتهم الثورة فى أهدافها النبيلة، وعلينا بإحترام صرخة الآخرين سواء أتفقنا معهم أو أختلفنا.

زهرة الشمس محمد