سماح يا أهل الهـوى

سماح يا أهل الهــوى 

ربنا سبحانه وتعالى لما قال إن الإنسان يعفو قال عند المقدرة , والمقدرة بتفسيرى البسيط هى قدرة الإنسان النفسية والعقلية على العفو .
طيب لو الإنسان لا يمتلك هذه القدرة هل يصبح أثما"؟ أكيد لا ...لا لأنك ما عندكش القدرة ونفسك مش جايباك ... مش قادر يا عالم مش قادر
يعنى ربنا هيجازيك خير ويدخلك فسيح جناته لو عفوت بس مش هيشويك فى جهنم لو قلت لا ...ساعة ما هترفض انك تعفو هتكون بتطالب بالقصاص اللى هو صلب الحياة
قاعدة مهمه جدا من قواعد الحياه والدين هى الحساب..من أخطاء يستحق العقاب
من فترةه طويلة السعودية عرضت مبلغ مالى رهيب فى مقابل مبارك وفكرت على إستحياء قلت وماله ياخدوه و اللى جاى منه احسن منه
وبعدين سكت الموضوع جوايا لفترة لحد ما بدأت سلسلة الافراجات اللى اصابتنى بنوع من التوتر والنرفزة وحرق الدم ( منك لله يا مبارك حارق دمنا قاعد وحارق دمنا مخلوع ).وحسيت إننا بيتلعب بينا
القصه بدأت بالافراج عن سوزان ثابت مقابل توكيل عملته بجزء يسير جدا من مالها لا يتعدى ال24 مليون جنية ......
دول بتوع إيه بقى أحب أعرف ؟؟؟؟؟؟
يعنى لو الست كانت قنوعة وده المبلغ اللى حوشته من مالنا فى 30 سنه وبس كنا سيبناه لها وقلنا حلال عليها 800 الف فى السنة أو 67 الف فى الشهر وأهى بتشقى برضه ومتمرمطه زيارات وندوات وفلاشات ...ويا بلاش ده ماجاش مرتب رئيس مجلس ادارة جريدة الاهرام!!!!!!!!!!!
إنما الهانم كانت عينها فارغة وكانت بتغب فى بير ماله قرار وعماله تشفط فى البلد دى لحد ما جابوها عالعضم وشفطوا اللى جوه العضم كمان...
أفرجوا عنها بمنتهى البساطة لانها تنازلت ......هو كان ورثها؟ أو كان لا قدر الله نصيبها فى شىء مش عارفينه فبتتكرم وتتنازل عنه!!
ومن إمتى المختلس بياخد براءة بمجرد تنازله عن المال اللى اختلسه... ده أولا
وثانيا ده مش كل اموالها ده جزء منها وهى تمتلك حسب كلام الأجانب اللى إسم الله عليهم ما بيكدبوش أبدا مليارات فى فرنسا وسويسرا ولندن وامريكا
هى لو عاوزة تتوب كانت تعمل توكيل عام رسمى غير قابل للإلغاء بسحب جميع أرصدتها المختلسه منا أينما وجدت فى مصر أو فى الخارج وكمان التصرف فى جميع ما تملكه من عقارات وما شابه ...وللا أيه؟
أنا مش بشكك فى النائب العام ولا أى جهه مسئوله عن التحقيق فى الملف ده بس بصراحة فيه حالة من التراخى أو الرأفة أو أى شىء أخر لا أفهمه ولا نفهمه كشعب فى الطريقه اللى بتدار بيها الملفات دى
وكمان تكرمت وتنازلت عن فيلا مصر الجديده ...كانت مهرها تقريبا أو مكتوبه فى القايمه بتاعتها !!!يعنى كلام يجنن العفريت
ممتلكات الدوله هتتكرم وتسيبها شوفتوا ماما سوزى حنينه إزاى ماهو قلب الأم برضه يا جماعه.
الدوله بعمايلها دى بترسخ شىء مرعب هيرجع بينا لبعيد اوى.. وبالمنظر ده بقت دوله حق العرب ...زى فى الصعيد تمام ...حب على راس عمك الحاج ورجع له فلوسه وحق نفسك ليه يا واله ....وأبا الحاج يتمنع الأول ثم يوافق ويشربوا الشربات ...وأبوك عند اخوك
بالطريقه دى أنا بشجع الإجرام وبقول بالفم المليان يا جماعه البلد سايبه إللى عايز يغرف منها يغرف لو فلت وما إتقفشش يبقى بالسلامه, لو إتقفش نحقق معاه ويعمل لنا توكيل ويرجع راجل شريف ، ولو اتمسك بعد ما شغل الكام مليون هناخد أصل المال ونسيبه ونعفو وأهو نفع وإستنفع.
وساعتها بقى نقفل كليه الحقوق وكل واحد ياخد له دورة مدتها 3 شهور فى فض المنازعات بطريقة سلميه ونسرح القضاة والمحققين ونقفل النقابة بتاعه المحامين ونطلع كارنيهات مطيباتى بدل محامى .
الإختلاس قضيه لا يمكن أبدا اسقاطها بمجرد استرداد المال المختلس لان مد الايد فى حد ذاته جريمه ...دى جريمة من جرايم الشرف
العفو له شروط وله ضوابط مش سداح مداح ...العفو قوه مش ضعف....
كل إللى بيفكروا فى العفو عن مبارك ياريت بس لثوانى يفتكروا هل مبارك لو إنت عديت قدام بيته كان هيعفو وللا هتنضرب من حرسه بالنار؟؟
هل مبارك لما سرق بطاطين المنكوبين فى الزلزال وفكها ببطاطين سودا من بتاعه الجيش رحمك؟؟؟ ده أكل مال اليتامى والمنكوبين.... خان الأمانة
هل مبارك أو زوجتة أو إللى حوالية لما خلونا نشحت من كل دولة شوية وسرق الفلوس إللى بيمنوا بيها علينا كنت إنت فى باله أو فكر فيك ؟
مبارك لما إتسئل عن النعوش إللى كانت بتيجى من العراق قال وإحنا مالنا هو حد قال لهم يروحوا هناك .؟
تخيل للحظه بس للحظه واحدة لو إنت سرقت 100 جنيه عشان تعالج إبنك من خزنة الدولة حد كان هيسامحك؟؟؟؟؟؟؟؟؟؟
إنت عمرك ما كنت عزيز على الراجل ده ولو هو أعز عليك من نفسك إللى كان هيهينها وينكل بيها لو فكرت تغلط أو فكرت حتى تعمل الصح إللى هو قد يراه غلط ...يبقى إنت حر
أسفة جدا إحنا كده مش بنبنى دولة العفو إحنا بنبنى دولة الفساد والظلم والتجبر ...بنبنى دولة الكفر إللى لو سرق فيهم الشريف سامحوه ولو سرق الجعان قطعوه
لو عاوز تسامحه سامحه بس ربنا مش هيسامحك أبدا إنك نصرت الظالم ...
وأنا عن نفسى مش مسامحاك يا مبارك لا دنيا ولا آخرة وهقتص منك يوم الدين يوم لا ينفع مال ولا بنون إلا من أتى الله بقلب سليم.