سلام يا صاحبى

عاجز يا طير...
بدون جناح ولاريش...
عايش يا طير...
تحلم والحلم مابيجيش...
تعدى الايام ورا الايام...
وتستنى وتستنى...
والغايب ما بيتنسيش...
عايز تطير لفوق...
لكن حجمك مايكفيش...
طلبت المساعدة...
لكن الناس بترفض...
وما بتستحيش...
حاول تغير حلمك...
مادام الزمن...
قصقصلك الريش...
حاول تنسى وتعرف...
إن اللى بيروح مابيجيش...
حلمك كان على أده...
بس يا مسكين حاول تعيش...
لا الظابط يكون عسكرى؟...
ولا العسكرى يصبح شاويش!...
فرموك يا صاحبى...
لكن عليك ما اخبيش...
دول مهما اتهانوا...
هايفضل العسكرى عسكرى...
وهايفضل الشاويش شاويش...
وماتنساش يا صاحبى...
إنك عاجز بدون ريش...
واللى بيجى فى الريش...
يا صاحبى بيكون بقشيش!...
شكوتك لله يا صاحبى...
اصله اللى عنده ما بيتمحيش...
سلام يا صاحبى...
وأنسى اللى راح وعيش...