ساعة العصرية

يا سلام علي الشاي ساعة العصرية

وانا قاعد احكي مع الولية

ومرحرح كدة جوه الجلبية

وعلي الكرسي مربع رجلية

والله حاجة مية مية

وهوبا تيجي السيرة اللي هي

وتطلع الحاجات المستخبية

اللي كانت منسية

عاوزة كام جلبية

ولأمي كمان هدية

والعيال عايزين مهلبية

وحاجة البسها في رجلية

وحاجة احطها في ايديا

ينتقم منك يا بنت سنية

ما كنا حلوين يا ولية

ليه بقي السيرة ديه

يا ريت كان بايديا

ما انتي عارفة ظروف المهية

يدوب الكهربا والميه

وحتي اللقمة مش مكفية

فوقي واعقلي يا حمدية

جوزك ماهوش من الحرامية

ومالوش في الحاجات المخفية

اشمعنا جارتنا رسمية

طالعة نازلة بالألف والمية

دي كانت بنت فقرية

ومش لاقية سندوتش الطعمية

ايه اللي جري في الدنيا ديا

ابدا جوزها لقي لقية

وبقي مستشار لشلة حرامية

نضف وغير العربية

والبركة في حزب الديموقراطية

اما احنا يا ولية

ها نفضل ولاد فقرية

ومالناش في السكة ديا

ويعوض عليكي وعليا

راحت قاعدة العصرية