رساله نيليَّه..

1
حبّيتَك ،ياأعقل مجنون..
يابوقلب كبير ويساع الكون
ياطفل سماوى مالوش فى "اللون"...
وباحبّ عينيك القوّاله...

2
رُدّ عليّا،، عبَّر قلبى
ده انتَ حبيبى العالى وصاحبى
حِبِّنى..قرَّبنى من ربّى..
عبَّرنى..إبعت لى رساله..
3
دوِّبنى حُبَّك..بكَّانى..
وانتَ ولاحاسس بكيانى
صَمتَك..، أنا سامعاه بودانى....
وعينيك انا فيها رحَّاله..
4
دمعه ورا دمعه بتلالى
البُكا من شُوقى يحلالى
ياسايبنى وانا باغلِى ياغالى
إغرَقْ ...فى دموعى السيَّاله
5
أرجوك، ماتسيبنيش كده ضايعه
مش فاضِل غير آخر شمعه
وانا دايبه فى عينيك الروعه..
وانتَ فى كُلّ دقيقه بحاله...
6
مجنون...،بسّ باحِبَّك جداً
بالاقيك لما الفَجر بيِدَّن ..
وادعى لَك تِفرَح ولاتِحزَن
من غير ماتكون زىّ الآلَه....
## ## ## 17/3/2011 عصرُ الخميس