رسالة نعي الى مسافر

( هي رسالة نعي الى مسافر )

ماتبقى من رماد الايام
حملوني أجمل سلام
روحي وگليبي وعيوني
الي ماتِقبل تنام
كُلهم ايسألوني عنك
كلهم يلهجون باسمك
كِسرو الخاطر حرام
جسمي يرجف00جرحي ينزف
شَرْد أجاوبهم شگول ؟!
ضاع من عندي الكلام
لملمتْ أشلاء روحي
وصَبَرت بالگُوه نوحي
جيت أگلهم قصة أحلامي الدفينه
گلبي مابَطَل ونينه
حرت أبدي امن البدايه؟
امن النهايه؟
أحچي حاضر وأترك الماضي ورايه؟
لو أفتش ذكرياتي
وأبحث بكومة رمآد
عن جرح غطيته بيدي
جرحي صار بنص وريدي
هيه طعنه زغيره لكن!
طََشت بكل الأماكن
بالجسد حطت سموم
وكبَّرَت بيه الهموم
ضيعت لذّة جديدي
عمري ظلمه وصار أسود
أشكي اِلمن ماكو أحد
وعيني تربي اعله الدروب
تأملت مره تجيهه
حتى تُغفه تنام بيهه
وراسي أحطنه اِعله صَدرك
وألتمسْلك آني عُذْرك
كونَك تمسي عليهه
وانت وينك؟؟
گتلي أرجع مااِجيت
طَوَّل هوايه غيابك
وأبد ماظني نسيت
رسْمَتْ الأيام دربك
وضَيَعتْ بالغُربه حُبك
ومادريت0000000
مادريت شصار بيه
أحرگ بروحي خطيه
شمعه ذوبني العشگ
وشتِعِل بس ماطفيت
اونشتَلتْ بروحي اِنت
غصن أخضر ورديت
ومن مشيت ؟؟
روحي جفت من ألَمْهه
عود يابس هالصفيت
وارد أسألك ؟؟؟؟؟
هم أجي بيوم اعله بالك؟
مره مَريتْ بسؤالك؟
لو تظل تحرگني بيدك؟
بالغُرب ضايع بريدك
وانتَ حال الضيم حالك
شلون أصبرچ آ يروحي
راح أشِل بيدي جروحي
وأبقى ناطرَ دگِتَك يوم اعله بابي
ضيعت مني شبابي
الحزن زارعني بارضه
صِرت أكتب ألف ومضه
دفتري خلص سطوره
ومابقت بأيامه لحظه
خَلَّصت كل الخواطر
طَبگْت كل الدفاتر
يمكن بيوم التجيني
قصدك تفرحلي عيني
تلگه نعيّّ وقطعه سوده
على بابك يامُسافِر
بچت الدنيه بأسرهه
وكَسَّرت كل الخواطر
!!!
جاءَفيها مايلي0000000
(تتقدم دولة الحنين ببالغ الأسى والحُزْن لنعي (السيده شهيدة الانتظار)
على أثر حادث مؤسف اِسمه الفراق بتاريخ:
سنة الحزن/شهر الاشتياق/يوم اليأس)0