رسالة من رجل

وصلتني هذه الرسالة من رجل سعودي يبدو انه مر بظروف قاسية في حياته الزوجيه ، وقد قام بارسال صور لكل زواجاته واوراق طلاقه ولان القصه حقيقية انشرها لكم للفائدة ، مع تمنياتي للجميع بالتوفيق والسعادة في حياتهم الزوجيه .

الرسالة كما وصلتني ( تحتفظ الإدارة بصور المستندات بغرض الخصوصيه )

الاخت الرائعه أحساس أنثى
السلام عليكم ورحمة الله وبركاته
اول شي اشكركم على القروب وعلى المدونة وعلى الموضوعات السنعه والصريحه شبعنا من سخافة الموضوعات التي ذبحونا فيها القروبات هرج ومرج وكلام فاضي واشهد بالله انك سنعه واخت رجال وانا اسمع كثير عن الطلاق اللي زاد هاليومين ويقولون السبب الازواج يعني الرجال والحقيقة ان السبب هو في بعض بنات هالوقت اللي مافيهم لا قيمة ولا شيمة ، وانا عندي الدليل وبالاثبات بعد واسمعوا قصتي .

الزوجه الاولى
ازعجني الوالد والوالدة الله يحفظهم تزوج نبي نشوف عيالك ، وقدر الله علي وتزوجت من بنت عمي وياليت اللي حصل ما كان طحت بلي وحدة رفلا يعني كسوله ما تغسل وجهها قلنا ماشي ، ولاتعرف تطبخ قلنا تتعلم وماتعرف تتكلم قلنا مع الحياة تفهم واتفه شي يرفع ضغطها وماغير نايمه بالنهار وصاحيه كنها جني بالليل وتقولي تعال اسهر معي انت مانت رومنسي الله يلعن الرومنسية اللي تعرفينها بلاك ما داومتي دول الليوم ولا كرفتي نايمه للعصر وشبعانه نوم ،،، المهم خربت العلاقه وطلقتها .

الزوجة الثانيه
نفس الاولى تقريباً بس شكاكه لو اكح قالت ليه كحيت وين تبي وين رايح ومن وين جاي ، واذا طقت براسها لبست عباتها وطلعت و فوق هذا تصك جوالها واروح ادورها بالشوارع والا عند اهلها كل يوم وانا متصل على فلان وعلان عندك فلانه جتكم كلمتكم صرت كني توم وجيري انا ويها ولا وفوق هذا ترفع صوتها علي وعلى امي وهات يا شتايم ويا تهايم .

الزوجة الثالثه
يقولون الناس العيب بي انا ماهي معقولة ان حرمتين ما مشو معك بصراحه شكيت بنفسي وقلت يمكن اني داج ما عرف للحريم وقررت اني ما اتزوج واريح مخي حاولوا مرات ومرات وازعجوني وقلت ياالله يمكن هالمرة تضبط وكل ما راحو اهلي لناس قالو لا والله ولدكم لعلاب ماهو حق زواج .
المهم سافرت للاردن ادرس ولقيت ذيك البنت اللي مافيه زيها جمال ودلال وانوثه ورقه ونعومة ونضافه وشياكه كل المواصفات قلت بخاطري يمكن انها من ناحيه الشكل زينه بس الله اعلم بالاخلاق مرت الايام وقررت اتزوجها وفعلاً وفقني الله وتزوجتها هالحين لي معها 3 سنين مبسوط اخر وناسه بيتي نضيف وبالي مرتاح وملابس نضيفة ومرتبه وصار وقتي منظم نومي واكلي وكل شي بحياتي صار عال العال ، وفوق هذا كلها فتحت مشروعي الخاص من فلوس هي جمعتها من غير مدري ودعمتني مادياً ومعنوياً ، ملابسه ما تغيرها الا مرتين بالسنه بس والباقي هي تفصل وتضبط بنفسها غير التحف اللي تسويها بالبيت ........... ياهووووووه تحس انك عايش
وانا اكتب هالموضوع مو على شان اقهر احد انا اللي ابي اقوله للبنات فكروا ترى الدنيا مافيها خير واذا كنتي حلوة بكرى تصيرين عجوز واذا انتي متعافيه بكرى تمرضين واذا تحسبين الحياة فله بس ترى فيه موت وحساب وعقاب .

الكاتب/ محمد أبراهيم حسن السلطان - مهندس بشركة أرامكو السعوديه - القصيم

اتمنى من النساء الشفافيه في الرد على مقالة الكاتب ، واحترام الرأي الاخر مهما كان .

( المقال يعبر عن رأي شخصي ولا يعبر عن رأي إدارة المدونة )