رسالة إلي الرئيس مبارك

باسم شعب مصر العظيم ومستقبله وحاضره وذكرياتوا

احب اقولك باسم الثورة وباسم شهداءها اللي ماتوا

مهما قالوا ومهما عادوا مش هيغيروا للشعب إعتيادوا

الشعب عشقك وإتعود عليك ومش بتحلي غير بيك اوقاتوا

يامبارك يازعيمنا يامبارك ياحبيبنا

ياللي معاك ماضينا وحاضرنا

كنت بتمني يانور عينا

يبقي معاك أنت مستقبلنا

وفين هنلاقي بس رئيس زيك يفهم بالحس

لبق في المحاور السياسية وفي وقت الحرب هس

أول ما فتحت عيوني عليك يابطل حكيولي

قالوا صاحب أول ضربة وعقله يتقدر بالدهب واللؤلي

قالوا شجاع قالوا جريء وشه ملاك قلبه طفل بريء

قالوا بطل وكمان قناص وجوهره الإخلاص ومن الغدر بريء

وأول ماكبرت شوية وبقيت كمان في الإبتدائية

وفتحت بإيدي كتابي لقيت صورة عزيزة أبية

وقالي بفخري أستاذي دا صاحب أول ضربة جوية

دا ريسنا اللي حامينا اللي بيسهر ليله علينا

دا حبيبنا نور عنينا اللي جاب الأمان لينا

ومرت ايامي وسبقتني وفي الجامعة لقتني

ومرة وانا في محاضرة لقيت أستاذي عليك بيسألني

بيقولي الريس ايه بيمثلك ومين مبارك في حياتك

سرحت طبعا ياريس وجت في بالي كل أمجادك

قولتله حبيبي ونور عيني ومشفتش غيره من يوم ميلادي

ولو جا يوم ومبقاش رئيسي والله ماتلزمني بلادي

طب إزاي بعده هحس بأمان ولو جاني خطر علي مين هنادي

وزعلت قوي منك ياريس لما عرفت إنك مش هتترشح تاني

دااحنا نتعب ونتوه من غيرك شباب كبار كلنا هنعاني

وفجأة سمعت في الأخبار ان شبابنا قايمين بمظاهرات

قولت أكيد بيطالبوا حبيبي يترشح تاني في الإنتخابات

لكن لقيتهم بينادوا برحيلك بيقولوا انتهي خلاص تمثيلك

لقتني غصب عني نفسي ياريس اناديلك

واقولك حقك عليا كل الغلط امسحه فيا

ايوه عايزين نطور بلدنا لكن مش بالطريقة دية

وصدقني الكلام الجارح مش من شبابنا في ايد وراهم خفية

إيد كمان مش مصرية أو مصرية بس بالبطاقة

وصاحبها احنا منعرفوش زمفيش بينا وبينه اي علاقة

احنا كان هدفنا الإصلاح ونشوف مصر علي الطريق الصحيح

مش قصدنا الإهانة ولا كلام السب والتجريح

ومش احنا المصريين ابداً اللي نعيش اي شخص جريح

ياريس احنا كنا عايزينك انت لا برادعي ولا سليمان ولاحتي جمال

لإن مصر في عهدك أنت كانت عظيمة وأعلي من الجبال

طبعا فاهمني ياريس قبل جمال وأصحابه مايحكمونا

ويتحكموا في البلد وفينا كأنهم خلاص استعبدونا

ولو بس عبرنا عن رأينا تحت الأرض يحبسونا

تصدقنا ياريس لو قولتلك إنهم كانوا علي النفس بيحاسبونا

مش هقدر احكي تاني ياريس بإختصار دول كانوا بيبهدلونا

وانت طبعا ياريس فاكر ان البلد عايشة في حرية

وفاكر ان اوامرك بتتنفذ وبلدنا قمة في الديمقراطية

تسمحلي بعد إذنك اقولك كلامك عندهم مكنش ليه اي اهمية

كان الآمر الناهي احمد عز وجمال كان يقوله ايه العظمة دية

برافو يااحمد يابرنس انت كده مية المية

طبعاً ياريس كلنا فينا عيوب والكمال لله وحده بس

وانت عيبك خطيرجداً عيبك انك عالي الحس

لماح وبتفهم بالنظرات وثبوتك ثبوت الاوتاد

وعيبك كمان جمال ما ربنا قال فتنتكم الاولاد

ليه ياريس سبته يتحكم فيك آهو قضي علي عزك والامجاد

وكان هيقضي خلاص علينا وعلي اخر لحظة انقذنا البلاد

انت كنت شمس نهارنا والقمراللي بينور ليلنا

والنجوم اللي بتهدينا والكتف اللي شايلنا

عارفة إن حملنا كان تقيل وإنك شفت مننا المستحيل

بس احنا كنا عايزينك ومالناش غيرك بديل

مش انت تبقي في الصورة وجمال هو بطل التمثيل

احنا كنا ولادك انت ياريس يمكن ساعات بندلع عليك

ويمكن شيطانا يوسوسنا ونغلط كمان فيك

لكن كنت في وقت الجد بتلاقينا كلنا حواليك

زي دلوقتي في وقت مرضك كلنا بندعي ربنا يشفيك

وإن كنت قصرت في حقنا ربنا وحده عالم بيك

وإن كنا احنا اساءنا ليك لحد عندك حقك هيجيك

وبالنيابة عن كل الشعب بقدملك كل الحب

وبعتذرلك عن الإهانةياللا بقي سامحنا بقلب الأب

دي رسالتي ليك ياريس واعذرني علي التقصير

لإن مفيش كلام يقدر يعبر عن التقدير

مهما قولت ليك مكانتك أعلي بكتير

يسلملي قلبك الكبير ويدوملي عقلك الخطير

ياريس ثورتنا مش ضدك ثورتنا كانت بهدف التغيير

يشفيك ربي ياريس وتفضل مصر دايماً بخير

آسفة لو كلامي جرحك أو لفظ مني اثر فيك

يس هية دي الحقيقة اللي كان لازم تبقي بين أيديك

..............................................

يامصريين ارحموا عزيز قوماً ذل