ذكرياتي

 ذكرياتي " شعر نادر الأسيوطي"

ذكرياتي ذكرياتي

حلم حلو في حياتي

لو تخيّرني ما بينها

هيّه أغلي م اللي آتي

ذكريات أصحابي لما

كُنّا شله كُنّا لمه

نلعبوا ونغنوا صحبه

والحياه بَيّسه وضمه

والشوارع والحواري

والجميع لينا جواري

قوللي ايه طلبك حبيبي

قلت يلّه اعملي حاوي

والحيطان سايبه علامه

من حنين الذكري يامه

خط ايدي فيها علم

رسمة الوش بوسامه

والشباب الحلو جمع

لبسه شيك حلو بيلمع

والخدود وردي وحمرا

والعيون تبرق وتلمع

والمدارس ليها ذكري

لو حنحكي نغيب لبٌُكره

والملاعب والجناين

والمعلم عنده فكره

والبنات الحلوه شايله

الكتب وعليها حانيه

ف الصدور القلب ابيض

في القلوب الهمه عاليه

والجدود و بجد دُوُلَه

خففوا نص الحموله

لوله همه كنا ضعنا

والعذاب مرفوع بِدُوُلَه

ذكرياتي دي حياتي

فيلم بنشوفه ليلاتي

حته منه دفعه ليّه

تمحي من صدري آهاتي

شعر نادر الأسيوطي