حوار النيل مع أبو الأمصار

....ايه يا نيل؟ مالك عايز تحول مسارك في الحبشة!!
...يا عمي أنا جيت لكم ما سألتوش فيا ولا حتى سبتوني اروح للبحر في حالي!!
....قصدك ايه يا عمي النيل؟
....يا بويا انت موش شايف الناس بترمي فيا ايه؟
....بترمي ايه يا خويا؟
....الأول أقولك جدك فرعون كان بيعمل ايه؟
....قول يا سيدي!
....كل سنة كان بيجوزني أحلى عروسه في مصر عشان كان عارف قيمتي!! ودلوقتي المصريين بيجوزوني حمير ميتة ويأكلوني زباله ويشربوني مجاري!!
...يا خبر!! صحيح يا عمي نيل؟
....إي والله وكل مصنع يجيب زبالته ويعميني بيها !! هيا دي الضيافة يا ابو الأمصار؟؟؟؟؟
....يا شيخ المصريين بيحبوك ويغنولك !! دا حتى اللي كانوا بيغنولك لك أكبر مطربين في مصر!!
....آه موش هو الراجل اللي كان بيقول سمعت في شطك الجميل ما قالت الريح للنخيل؟
....طيب ما انت عارف أهو بنفسك!!
....وكمان كان فيه واحد اسمه عبد الحليم بيقول يا تبر سايل بين شطين يا حلو يا اسمر!! يعني بيدلعك كمان
....يا با دا كلام فض مجالس!!! انت ما سمعتش المثل بيقول أسمع كلامك أصدقك أشوف أمورك أستعجب!!
....والله ياأخي أنا مكسوف منك ...
....أصلك ما تعرفشي اللي حصل!!
....ايه ياعمي اللي حصل
....يا ابو الأمصار الشط بتاعي راح تحت المباني...يعني الشط اللي كانوا بيغنولو بقى ستارة أسمنت ومراكب سياحية يعني قصقصولي وحلقولي زيرو وركبوا على عنيا نظارة سوده عشان ما شوفشي مصر
....ها قولك ايه؟ موش لاقي كلام!!
....لكن ايه موضوع سد النهضة ده اللي سمعنا عنه؟
....دا موضوع قديم شاغل الناس الغلابة اللي في الحبشة وعايزين يشوفوا مصلحتهم.
....وانت ايه رأيك؟
....الله!! يا ابو الأمصار هم برضه موش أولادي وتهمني مصلحتهم؟ ايه الفرق بين اولادي المصريين والأحباش؟ كلهم اولادي!!
....ما قلناش حاجة بس هم كده هايقطعوك عنا!!
....يا اخي روحولهم واتفقوا معاهم وانا تحت أمركم انتو اللي اتنين..اللي تتفقوا عليه ها نفذه
....بقول ايه يا عمي نيل؟ أسألك سؤال وتجاوبني عليه بصراحة
....إسأل
....هم بيرمو فيك زبالة زينا؟
....بصراحة ما فيش ناس يعملوا اللي بيعملوه المصريين..ما تزعلشي مني!! هو فيه حد لا مؤاخذه عفوا باردون إكسكيوزمي إكسكوزيه موا إنشولدجنزيه سوري يعمل ببيه في الميه اللي بيشربها؟................................