حقيقة تحقيقات القناة السورية مع عناصر الخلية الارهابية

سيناريو وحوار:
رئيس فرع المخابرات العسكرية
تصوير:
سيادتو
تمثيل:
قام بدور البطولة السائق الشخصي لسيادتو
دور عضو الخلية السائق الشخصي لزوجة سيادتو
عضو الخلية الاخر سائق اولاد سيادتو
قام بدور السلاح... سلاح حراسة سيادتو
قام بدور الديكور....مكتب سيادتو
قام بدور الدخان المتصاعد....سيكارة حمرا طويلة من باكيت سيادتو

اللقطة الخمسين....المقطع الاول....اكشن

- قرد ولو....مخك مصدي انت ....كلين كلمتين ماضل تعرف تقولون
- العميد: سيادة اللواء....والله بعرف احكيين....بس مابيصير...سيدي
- اللواء: شو يلي مابيصير ولو.....شو يعني مابعجبك يعني....عم تستجحشني يعني
- العميد: العفو سيييدي...العفو....مو هيك القصة....بس انا بلباسي العسكري وحاطط رتب مابيصير امثل الدور سييييدي

اللواء يدرك صحة كلام العميد لكنه يحاول اخفاء غباءه عن العناصر

- لك بعرف بعرف ولو عميد...بس عم نعمل عليك برودا...يعني تجربة .... تجربة ولو
- العميد: يعني بروفا سييييدي
- اللواء: تعا قعود محلي ولك قرد....هي برودا....بس بيحرفوها المندسين وعملاء الامريكان والحريري والقاعدة يقولو عنها بروفا....ولك قرد لاتكون انت واحد منين
- العميد: متل ماعم تقول سيييدي....برودا...بـ....بـ...بررودا....وانا كماني قلت بروودا سيييدي

يستريح اللواء على كرسيه ليعيد التفكير بعد اكتشافه اخيرا بان العميد لاينفع لتمثيل دور رئبس الخلية الارهابية كونه يحمل رتبة عسكرية كما انه كبير في السن...
يخرج سيكارة من باكيت الحمراء الطويلة الملقاة على الطاولة...يشعل السيكارة ويضغط على الجرس ليطلب من الحاجب احضار كاس شاي....

يستنشق نفسا عميقا من سيكارته المشتعلة ليبتعد بتفكيره في البحث عن اشخاص ملائمين لاداء المهمة المكلف بها باسرع وقت كما طٌلب منه....يمعن النظر بسائقه الشخصي الذي يحمل كاميرا بيده وينتظر اوامره لينهي تصوير حلقة بعنوان "اعترافات خلية ارهابية" من المسلسل المكسيكي الذي يعرضه التلفزيون السوري بعنوان " المندسون" بطولة الممثل التركي مراد علمدار والنجم الايراني المستورد خصيصا لاداء دور الشبيح المجهول

- طفيها هالكاميرا ولك قرد.....بدك تفضحنا يعني....بدك صورتنا تطلع على القنوات العميلة المتأمرة على سيادة الرئيس....ومقاومتو للاستعمار والامبريارية
- يتابع اللواء: انت مابتعرف تمثل ولك
- السائق الشخصي: بعرف سييدي....بعرف....انا مثل مين سيدي....انت معلمنا...بتمون بتمون سييدي
- اللواء: لكن حفظ الدور ياابني....معك خمس دقايق وتكون جاهز....والا...بربي نزلك على المنفردي....والمنفردي يعني الدولاب...يعني بساط الريح....يعني الكبل الخماسي....يعني قلع الاظافر.....يعني كهربا ولك....وبتعرف وين بنكهرب ما هيكي
- السائق: احفظ شو سيدي....بربي ماعملت شي سيييدي
- اللواء: ولك الدور ولك ....ماقلت انك بتعرف تمثيل
- السائق: مثيل شو سيدي
- اللواء:ولك جحش ولك....صارلك ساعة عم تصور الدب العميد وهو عم يقوم فيه
- السائق: يعني احكي مثل العميد....سيييدي
- اللواء: لك اي..اي...صحيح انك مابتفهم

يمسك اللواء الكاميرا من يده ويامره بالجلوس على الكرسي....يجلس على الكرسي المقابل له ويشعل سيكارته
- ولك....هي شلون بتشغلوها
- السائق: الكاميرا سييدي
- اللواء: اي ضراب السخن ولك
- السائق: من هالكبسة سييدي
- اللواء: الله يلعنكين هالجيل الجديد....جيل الكامبيوتر والفاسوكي....بس بدي اعرف من وين دخل عندنا هالفاسوك هادا....ولك نحن انفلونزا الخنازير ما سمحنالها تتجاوز الحدود السورية....الفاسوكي بيعمل فينا هيكي
- يتابع اللواء بعد تشغيل الكاميرا: بليش ولك بليش....احكي لشوف...اعترف ولك...قول انك زعيم خلية ارهابية
- السائق: بوس ايدك ياسييدي....بوس رجلك....بربي مابعرف شو هي الخلية....بربي انا معكن سيدي
- يقف السائق مذعورا يهتف باعلى صوته: بالروح بالدم نفديك يابشار....الله سورية بشار وبس
- اللواء يصيح للحرس: تعال ياابني ....نزلوه عالمنفردي...وامسحوا فيه الاراضي وتوصوا فيه عرفوا على بساط الريح هالمندس هادا
- ينظر الى السائق: بدك تعترف....يعني تعترف...ولك....بدنا ننسيك حليب امك اذا ما بتقول مين يلي جندك ضد الوطن وسيد الوطن ولك
- السائق يبكي ويمسح دموعه ويقرر الاعتراف: اي سيييدي....ان انا رئيس خلية سييدي
- اللواء: ولك حيوان ولك...لاتقول سييدي....قول...قول....حيوان ولك
- السائق: حيوان ولك
- اللواء: ولك يابن الـ..... قول يعني تابع ....تابع ولك حيوان
يجلب اللواء ورقة وقلم ويكتب العبارات التي يجب ان يعترف بها السائق ويمسك بالورقة من خلف الكاميرا لكي يتمكن السائق من قرائتها
- قرد ولو اقرا هي الورقة وركز على الاسمين....وقول انين بعتولك الكومانديس والدبابات والطيارات
- السائق: حاضر سييدي

يقرا السائق الورقة بقلب مليئ بالرعب والفزع....يسأله اللواء في التسجيل ودخان سيكارته يتصاعد امام العدسة
- وين مخبين الاسلحة والدبابات استاذ ارهابي....اسف على الازعاج على هادا السؤال....لاتواخذنا عزيزي زعيم ارهابي....بتحب نطلبلك فنجان قهوة....نحن دولة قانون حبيبي....لاتخاف احكي على رياحتك يعني.....بتحب اشعلك سيكارة حبيبي
- السائق: انا وصديقي قررنا نزرع الفتنة في كل المحافظات السورية....نحن نرش هالفتنة وهي بتنتقل من خلال غبار الطلع على باقي المحافظات
- يتابع السائق: اي السلاح.....خبينا السلاح ببيتنا بالقبووو....والدبابات خليناها ببيت الجيران قلنا منشان ماننفضح يعني.....بتعرف يعني....نحن خلية ارهابية ولازم نكون حريصين ماحدى يشوف الدبابات....حبيبي المحقق...انت عيوني ياغالي....الله يخليكين على راسنا يادولة القانون انتو
- المحقق: هل هناك دعم جوي كان سوف يصلكم حبيبي استاذ ارهابي....ولي علي.....اسف كتير اسف حبيبي.....بيجوز احرجت شعورك بهالسؤال السخيف....اذا بدك استبدل السؤال بسؤال تاني...على رياحتك يعني
- السائق: لا لا ياغالي....خلي السؤال...سؤال مابيخوف...بجاوب عليه ولا يهمك ياغالي
- يتابع السائق: هدول الاسماء يلي ذكرتين...مخبين كام طيارة تحت جسر الرئيس....واذا بدك باخدك تشوفين....انا ارهابي عندي مبدأ ومستحيل اكذب

ينتهي التصوير.....ينادي اللواء للحرس

- خدوا لهالحيوان من هون....اعترف الجحش انو ارهابي واعترافوا مسجل.....خدوا وبكرا نحيلوا على المحكمة مشان الاعدام....مابدنا نكذب....ونثبت للاعلام العميل الخارجي المتأمر علي سيد الوطن...باننا مسكنا الارهابيين وبدنا نحاكمن علني كماني....شو لكان

اللواء فخورا بنفسه لايجاد الحل ينادي فرحا باعلى صوته للحرس
- ياجحش ياابني....جيبولي كل السائقين بالفرع مشان نعلمين التمثيل
----------------------------------
اعتذر من القراء الاعزاء عن ورود بعض الكلمات النابية في النص....وذلك كان بقصد اظهار جانب بسيط ويسير من الاسلوب الحقيقي لعناصر الامن السوري في التعامل الطبيعي في الحوارمع الغير حتى وان كانوا من عناصرهم ومؤيديهم